Наполеоннинг 3 асрни кўрган қиличи аукционда сотилди

Франциялик император Наполеон Бонапартга (1769-1821) тегишли бўлган ва у томонидан ҳокимият тепасидаги даврнинг бошидан то охиригача сақлаб келинган қилич аукционда сотилди. Бу ҳақда “Giquello” хабар берди.

Маълум қилинишича, қилич Париждаги аукционда рекорд даражада – 4,7 миллион еврога сотилган. Дастлаб ушбу лот 700 мингдан 1 миллион еврогача баҳоланган.

Тарихий қуролни Наполеон 1803 йилда Версаль қурол ишлаб чиқарувчиси Никола Ноэл Бутега буюртма қилган. Бу қуролни император ҳукмронлигининг охиригача ўзида сақлаган ва сўнг уни империянинг сўнгги маршалига – Эммануэль де Грушига совға қилган. Ушбу қилич кейинчалик Груши оиласида авлоддан авлодга сақланиб келган.

Маълумот учун, Наполеонга тегишли буюмларнинг аукционлари император вафотидан икки асрдан кўпроқ вақт ўтган бўлишига қарамай, мунтазам ўтказиб келинмоқда. Мисол учун, 2024 йилнинг июлида унинг 1814 йилги тахтдан воз кечишидан олдин эгалик қилган иккита тўппончаси аукционда 1,69 миллион еврога сотилган. Бундан ташқари, март ойида Наполеонга тегишли бўлган “Фуқаролик кодекси”нинг бир жилди 395 минг еврога харид қилинган.

Қайд этиш жоиз, Наполеон 1821 йилда сургунда, 51 ёшида ҳаётдан кўз юмган.

Эслатиб ўтамиз, аввалроқ “Титаник”даги 700 нафар йўловчини қутқариб қолган капитанга совға қилинган олтин чўнтак соати аукционда деярли 2 миллион доллар (ўзбек сўмида 25 миллиард 501 миллион 500 минг сўм) га сотилганди.