Нани Қозоғистон клубига кўчиб ўтди

Қозоғистоннинг “Актобе” футбол клуби таниқли португалиялик футболчи Луиш Нани билан шартнома имзолади. Бу ҳақда клуб матбуот хизмати хабар берди.

Манбага кўра, Португалия терма жамоаси афсонаси Луис Нани билан 2026 йил охиригача мўлжалланган шартнома тузилган. Унинг “Ақтобе”даги маоши ошкор қилинмаган, бироқ хабарларга кўра, бу маҳаллий Премьер-лига тарихидаги энг юқори маош бўлиши айтилмоқда.

“Мен “Актобе” клубига қўшилганимдан жуда хурсандман ва Қозоғистонда клуб ҳамда футбол ривожига ҳисса қўшишни истайман. Клуб эгаси жаноб Нурлан Артиқбаевга, раис жаноб Арман Оспановга ва вилоят ҳокими жаноб Асхат Шахаровга меҳмондўстлик ва қўллаб-қувватлашлари учун миннатдорчилик билдираман. Клубнинг келажакка оид қарашлари ва режаларидан жуда таъсирландим. Бизни ҳам ички, ҳам халқаро майдонда янги чўққиларга олиб чиқиш учун бор кучимни сарфлайман”, дейди Нани.

Маълумот учун, Нани фаолияти давомида Европанинг бир қатор етакчи клубларида тўп сурган. Жумладан, у Португалиянинг “Спортинг”, Англиянинг “Манчестер Юнайтед”, Туркиянинг “Фенербаҳче”, Испаниянинг “Валенсия” ва Италиянинг “Латсио” жамоаларида ўйнаган. “Манчестер Юнайтед” сафида у тўрт марта Англия Премьер-лигаси, шунингдек, бир марта Чемпионлар лигаси ғолибига айланган.

Қанот футболчиси Португалия терма жамоаси сафида 112 та ўйинда майдонга тушиб, 24 та гол муаллифи бўлган. 2016 йилда эса терма жамоа билан Европа чемпиони унвонини қўлга киритган.