Наманганда ажрашганларни Туркияга фоҳишаликка юбораётган аёллар ушланди (видео)

Наманган вилоятининг Наманган шаҳрида ёш ва турмушдан ажрашган аёлларни Туркияга фоҳишаликка юбормоқчи бўлган икки аёл ушланди. Бу ҳақда Наманган вилояти Ички ишлар бошқармаси хабар берди.

Маълум бўлишича, Давлатобод тумани ва Наманган шаҳрида яшовчи икки нафар аёл олдиндан тил бириктирган ҳолда ёш ва турмушдан ажраганларни чет давлатига, хусусан Туркия Республикасига фоҳишалик билан шуғулланишлари учун жўнатишга ҳаракат қилаётганликлари аниқланган.

Суриштирув натижасида мазкур шахслар Янги Наманган туманида яшовчи 2001 йилда туғилган қизни турли ваъда ва ёлғон маълумотлар орқали ишончига кириб, Тошкент халқаро аэропорти орқали Туркия давлати Анқара шаҳрига фоҳишалик қилиш учун юбораётган пайтда ходимлар томонидан далилий ашёлар билан ушланган.

Мазкур ҳолат бўйича Жиноят кодексининг 135-моддаси (одам савдоси) 2-қисми билан жиноят иши қўзғатилиб, ҳозирда тергов ҳаракатлари бошланган.

Эслатиб ўтамиз, аввалроқ Самарқанд аэропортида Туркия давлатига фоҳишалик мақсадида кетаётган 2 аёл ушлангани ҳақида хабар берилганди.