Надаль “Реал” директорлар кенгаши аъзоси бўлди

Теннис бўйича 22 карра “Катта дубулға” турнирлари ғолиби, испаниялик Рафаэль Надаль “Реал Мадрид” клуби директорлар кенгаши таркибига қўшилди. Бу ҳақда Мадрид жамоаси матбуот хизмати хабар берди.

“Рафаэль Надаль спорт тарихидаги энг буюк афсоналардан бири, шунингдек, дунёдаги энг ҳурматга сазовор ва эътироф этилган испан спортчиларидан биридир. Испания ва жаҳон спорти учун намуна бўлган, спортдаги ва инсоний фазилатлари билан ажралиб турадиган инсоннинг директорлар кенгашимизга қўшилиши ва ушбу муҳим лавозимда клубимизнинг бугуни ҳамда келажагига ҳисса қўшиши “Реал” ва унинг барча мухлислари учун катта шарафдир”, дейилади “Қироллик клуби” баёнотида.

Маълумот учун, 40 ёшли Надаль “Реал”нинг мухлиси ҳисобланади. Унинг амакиси Анхель Надаль Испания миллий терма жамоаси сафида футбол ўйнаган.

Рафаэль Надаль дунё рейтингида биринчи ўринда жами 209 ҳафта бўлган. У ATP турнирларида 92 та совринни қўлга киритган. Испаниялик теннисчи икки карра Олимпия чемпиони ҳисобланади: 2008 йилда яккалик баҳсларида, 2016 йилда эса Марк Лопес билан жуфтлик баҳсларида олтин медалга сазовор бўлган. Шунингдек, у Испания терма жамоаси билан тўрт марта – 2004, 2009, 2011 ва 2019 йилларда Дэвис кубогида ғолиб чиққан.

Надаль Испания Қироллик спорт хизматлари ордени соҳиби ҳамдир. У 2006 йилда “Йилнинг энг яхши янги спортчиси” мукофотларини қўлга киритган. Шунингдек, 2008, 2010, 2013, 2017 ва 2019 йилларда ATP томонидан йилнинг энг яхши теннисчиси деб топилган.