Москва ва Пекиндаги парадлар жаҳон урушини қўзғашга уринишдан огоҳлантиради – Тўқаев

Москва ва Пекиндаги Иккинчи жаҳон уруши тугаганининг 80 йиллигига бағишланган тадбирлар унинг натижаларини қайта кўриб чиқишга ва янги глобал можарони бошлашга ҳаракат қилаётганлар учун огоҳлантириш бўлиб хизмат қилади. Бу ҳақда Қозоғистон Президенти Қосим-Жомарт Тўқаев бугун, 8 сентябрь куни халқига йўллаган мурожаатида маълум қилди.

“Жорий йил унутилмас саналарга бой бўлди. Биринчидан, бу йил Иккинчи жаҳон уруши тугаганига 80 йил тўлди.

Москва ва Пекинда ўтказилган тантанали тадбирларни инсоният тарихидаги энг қонли уруш пайтидаги жангларнинг ўн миллионлаб қурбонлари абадий хотирасининг намоён бўлиши, унинг натижаларини қайта кўриб чиқиш ва янги жаҳон можаросини бошлашга уринишлардан огоҳлантириш сифатида кўриш керак”, деди Тўқаев.

У барқарор тинчлик ва умумбашарий тараққиёт учун “яхши жанжалдан ёмон тинчлик афзал” деган муросаларни излаш кераклигини таъкидлади. Президентнинг айтишича, Қозоғистон шу боис Аляскадаги Россия-Америка саммити натижаларини, шунингдек, Вашингтонда Президент Трамп воситачилигида Озарбайжон ва Арманистон ўртасида тинчлик декларацияси имзоланганини олқишлаган.

Қозоғистон етакчиси бу йил Иккинчи Жаҳон уруши натижаларининг асосий институционал тимсолига айланган Бирлашган Миллатлар Ташкилотининг 80 йиллиги нишонланишини ҳам қўшимча қилди. Тўқаев Бирлашган Миллатлар Ташкилотининг ҳали ҳам муқобил варианти йўқ экани ва Қозоғистон фикрича, барча долзарб халқаро муаммоларни адолатли ҳал қилиш учун у асосий музокаралар платформаси бўлиши кераклигини таъкидлади.

“БМТни, айниқса, унинг асосий органи – Хавфсизлик Кенгашини ислоҳ қилиш зарурати мавжуд.

Яқинда Нью-Йоркда бўлиб ўтадиган Бош Ассамблеянинг юбилей сессиясида нутқ сўзламоқчиман, у ерда Қозоғистоннинг халқаро вазиятга қарашлари, жумладан, Бирлашган Миллатлар Ташкилотини ислоҳ қилиш бўйича таклифлар билан таништираман”, деди Тўқаев.

Эслатиб ўтамиз, жорий йил 9 май куни Москвада, 3 сентябрь куни Пекинда бўлиб ўтган ҳарбий парадларда Тўқаев ҳам қатнашган эди.