Мобил алоқа компаниялари тўлаган солиқлар кескин камайди

Хизмат кўрсатиш корхоналари томонидан тўланган солиқлар 30 трлн сўмдан ошди. Шунингдек, уяли алоқа компаниялари солиқ тушумларини кескин тушириб юборган. Бу ҳақда Солиқ қўмитаси томонидан эълон қилинган ҳисоботда келтирилган. 

Қайд этилишича, 2025 йил январь-сентябръ ойларида хизмат кўрсатиш фаолияти билан шуғулланувчи 161 351 та юридик шахс томонидан 30,1 трлн сўмдан ортиқ солиқ тўланган. Шундан 5,3 трлн сўмдан ортиғи, яъни 17,8 фоизи 20 та корхона ҳисобига тўғри келади. Уларнинг жами товар айланмаси 65,2 трлн сўмни, фойдаланган солиқ имтиёзлари миқдори эса 5,7 трлн сўмни ташкил этган.

Ушбу даврда солиқ тушумлари миқдори бўйича Asia Trans Gas етакчилик қилган. Мазкур компания 1,05 трлн сўмдан кўпроқ солиқ тўлаган. Кейинги ўринларни “Ўзбектелеком” (848 млрд сўм) ва Uzbekistan Airways (633 млрд сўм) эгаллаган. “Ўзбекистон темир йўллари” тўртинчи (492 сўм) ва Unitel (292 млрд сўм) бешинчи ўринни олган.

Шунингдек, иқтисодчи Отабек Бакиров уяли алоқа компаниялари солиқ тушумларини кескин тушириб юборганига эътибор қаратди.

Жорий йилнинг 9 ойи якуни билан 2024 йилнинг 9 ойига солиштирганда тўланган солиқлар:

• “Ўзбектелеком” АЖда 1 трлн 60,7 млрд сўмдан 848,1 млрд сўмгача;
• “Unitel” МЧЖда 474,4 млрд сўмдан 292,1 млрд сўмгача;
• “Coscom” МЧЖда 322,7 млрд сўмдан 224,2 млрд сўмгача;
• UMS МЧЖ 286,8 млрд сўмдан 158,6 млрд сўмгача қисқарган.

Иқтисодчига кўра, бу ҳолат уяли алоқа компаниялари учун акциз солиғи бекор қилиниши билан боғлиқ бўлиши мумкин. Яъни алоқачилар камроқ солиқ тўлаб, кўпроқ фойда олиш имкониятига эга бўлмоқда.

Эслатиб ўтамиз, аввалроқ Ўзбекистондаги мобил алоқа операторлари томонидан кўрсатилаётган хизматлар учун нархлар оширилгани юзасидан ўрганиш бошлангани ҳақида хабар берилган эди.