Мобил алоқа тарифларининг оширилиши юзасидан текширув бошланди

Ўзбекистондаги мобил алоқа операторлари томонидан кўрсатилаётган хизматлар учун нархлар оширилгани юзасидан ўрганиш бошланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълум қилди.

Қайд этилишича, қўмита томонидан мобил алоқа операторлари нархларни ошириши асослилигини ўрганиш мақсадида жорий йил ноябрь ойининг бошида тегишли тартибда сўровлар юборилган.

Ҳозирда хизмат сифатини яхшилаш ва қамровини кенгайтириш юзасидан алоқа операторлари томонидан амалга оширилаётган харажатларнинг нархларга таъсири тўғрисида тақдим этилган маълумотлар кўриб чиқиляпти.

“Ўрганиш давомида қонун бузилиш ҳолатлари, хусусан мувофиқлаштирилган ҳаракатларнинг аломатлари аниқланса, текширув тайинланади”, деб ёзилади хабарда. 

Шунингдек, агар юқорида келтирилган ҳолатлар тасдиқланса, компанияларга қонунчиликка мувофиқ қатъий чоралар қўлланилади.

Эслатиб ўтамиз, жорий йил 21 октябрь куни Президент Шавкат Мирзиёев раислигида ўтган сунъий интеллект технологияларини ривожлантириш юзасидан видеоселектор йиғилишида Ўзбекистонда аҳоли пунктларининг 99 фоизи мобил алоқа билан қамраб олингани маълум қилинганди.

Қобилова Комила