“Miss World-2026”: дунёнинг энг гўзал аёли аниқланди (фото, видео)

Кеча, 5 сентябрь куни Вьетнамда “Дунё гўзали-2026” (Miss World-2026) бош гўзаллик танлови ниҳоясига етди. Унда Доминикан Республикасидан Жоҳерри Мола ғолиб бўлди. Бу ҳақда танлов сайтида хабар берилди.

Хабар қилинишича, тадбир финали Нячанг марказида ушбу кенг миқёсли танлов учун яратилган энг йирик саҳналардан бирида бўлиб ўтган. Якунда Доминикан Республикасидан 24 ёшли ўқитувчи, журналист ва жамоат арбоби Жоҳерри Мола 73-“Дунё гўзали”га айланган. У тожни ўтган йилги ғолиб – таиландлик Опал Сучата Чуангсрининг қўлидан қабул қилиб олган.

Қайд этилишича, Жоҳерри Доминикан Республикасига “Дунё гўзали” унвонини охирги ғалабадан 44 йил ўтиб – 1982 йилда Мариасела Альварес тож олганидан сўнг қайта олиб келган.

“Мен бахтдан еттинчи осмондаман ва ҳали ҳам юз бераётган воқеаларни тўлиқ англашга ҳаракат қиляпман. Мен жуда бахтлиман ва ҳозир мамлакатим буни қандай нишонлаётганини кўришни хоҳлардим. Улар бунга лойиқ! Мени олдинда нималар кутаётганини интиқлик билан кутяпман – мен тайёрман”, дейди янги “Дунё гўзали”.

Танловнинг биринчи вице-гўзали испаниялик Элизабет Рейнес, иккинчи вице-гўзали эса малайзиялик Таанусия Четти бўлган. Танловда дунёнинг турли мамлакатларидан жами 111 нафар қиз иштирок этган.

Эслатиб ўтамиз, аввалроқ Колумбия дунёдаги энг гўзал аёллар яшайдиган мамлакат деб тан олинган эди.