Мисрда дунёдаги энг йирик ҳарбий штаб ишга тушди (видео)

Миср пойтахти Қоҳирадан тахминан 45 километр шарқда қурилаётган мамлакатнинг янги маъмурий пойтахтида дунёдаги энг йирик ҳарбий қўмондонлик маркази расман очилди. У ўзининг саккиз бурчакли архитектура концепцияси туфайли Октагон деб номланди. Бу ҳақда “Ahram Online” хабар берди.

Қайд этилишича, Миср Қуролли кучларининг янги Стратегик қўмондонлик штаби мамлакат ҳарбий бошқарув тизимининг асосий элементига айланган. Мажмуа армия, ҳукумат вазирликлари ва давлат муассасалари ўртасида ягона қўмондонлик, бошқарув, алоқа ва мувофиқлаштириш маркази вазифасини бажаради.

Октагон Миср Қуролли кучларининг турли қўшин турлари ва стратегик бўлинмаларини рамзий ифодаловчи, ўзаро боғланган саккизта асосий бинодан иборат. Мажмуа марказида асосий қўмондонлик биноси жойлашган бўлиб, у ҳарбий раҳбариятнинг узлуксиз маълумот алмашинуви ва ҳаракатларини мувофиқлаштиришни таъминлайди.

Мажмуа қарийб 92 квадрат километр майдонни эгаллаган бўлиб, у 13 та стратегик ва логистик ҳудудга бўлинган. У ерости маълумотларни қайта ишлаш марказлари (дата-марказлар), булутли рақамли инфратузилма, замонавий сунъий йўлдош разведка воситалари, катта ҳажмдаги маълумотларни (Big Data) таҳлил қилиш учун сунъий интеллект тизимлари ҳамда илғор киберҳимоя воситалари билан жиҳозланган.

Нашрнинг хабар беришича, объект портлашлар ва ҳаво ҳужумларига бардош бера оладиган ҳимоя муҳандислик ечимлари қўлланилган ҳолда лойиҳалаштирилган. Мажмуа, шунингдек, автоном электр, сув таъминоти ва совутиш тизимлари билан таъминланган бўлиб, бу фавқулодда вазиятларда ҳам унинг фаолиятини барқарор сақлаб туриш имконини беради.

Октагон архитектураси қадимги Миср рамзлари ва мувозанат, тартиб ҳамда аниқликни ифодаловчи саккиз бурчакли геометриядан илҳомланган ҳолда яратилган. Лойиҳа муаллифларининг фикрига кўра, штаб стратегик қарорларни тезкор қабул қилиш, инқирозли вазиятларни марказлаштирилган ҳолда бошқариш ва Мисрнинг мудофаа салоҳиятини мустаҳкамлашни таъминлаши лозим.