Мирзиёев Халқаро маслаҳат кенгаши аъзоларини қабул қилди

Ўзбекистон Республикаси Президенти Шавкат Мирзиёев бугун, 11 февраль куни Халқаро маслаҳат кенгаши экспертлари Альфред Гузенбауэр, Александр Квасьневский ва Штефан Фюлени қабул қилди. Бу ҳақда Президент матбуот хизмати хабар берди.

Билдирилишича, Ўзбекистонда ислоҳотлар стратегиясини амалга оширишга экспертлик кўмагини кўрсатиш ҳамда Европа Иттифоқи мамлакатлари ва институтлари билан кўп қиррали ҳамкорликни кенгайтириш мақсадида ўзаро манфаатли ҳамкорликни ривожлантиришнинг долзарб масалалари кўриб чиқилган.

“Илғор халқаро тажрибани ўрганиш ва жорий этиш, мамлакатимиз иқтисодиёти тармоқ ва соҳаларини модернизация қилишга технологиялар ва инвестицияларни жалб этиш борасида амалий ҳамкорлик қилиш муҳимлиги қайд этилди”, дейилади хабарда.

Шунингдек, Самарқанд шаҳрида ўтказиладиган "Европа Иттифоқи - Марказий Осиё" саммитига тайёргарлик доирасида халқаро ва минтақавий аҳамиятга молик масалалар юзасидан фикр алмашилди.

Эслатиб ўтамиз, Мирзиёев ўтган ойда Европа Кенгаши Президенти Антониу Кошта билан телефон орқали мулоқот қилиб, апрель ойида Самарқанд шаҳрида “Марказий Осиё - Европа Иттифоқи” биринчи саммитига тайёргарлик кўриш ва уни ўтказиш бўйича қўшма режаларни муҳокама қилганди.