Мирзиёев кейинги С5+1 саммитини Самарқандда ўтказишни таклиф қилди

Ўзбекистон Республикаси Президенти Шавкат Мирзиёев АҚШ Президентининг расмий қароргоҳи – Вашингтон шаҳридаги Оқ уйда бўлиб ўтган Марказий Осиё мамлакатлари ва АҚШ етакчиларининг “С5+1” форматидаги саммитида иштирок этди ва бир қатор таклифларни илгари сурди. 

“Бугунги саммит тасдиқлаб турибдики, Қўшма Штатлар Марказий Осиёни ишончли ва муҳим ҳамкор сифатида кўради. Биз биргаликда ишонч, ўзаро тушуниш ва яратувчанликка асосланган келажакни қурмоқдамиз”, деди Мирзиёев. 

Унинг таклифлари эса қуйидагилардан иборат:

• Формат доирасида доимий фаолият юритувчи котибият ташкил этиш ёки уни ҳар икки йилда иштирокчи давлатлар орасида навбатма-навбат жойлаштириш.
• Давлат идоралари, компаниялар ва молиявий институтлар ўртасида тизимли мулоқотни таъминлаш учун инвестициялар ва савдо бўйича вазирлар даражасида координация кенгаши ташкил этиш.
• АҚШ билан йирик транспорт, коммуникация ва энергетика лойиҳаларини амалга оширишда фаол ҳамкорлик қилиш

Шунингдек, Мирзиёев Марказий Осиё инвестиция шериклиги фондини тузиш ғоясини қайта фаоллаштириш долзарб, деб ўйлашини билдирди. Бу борада DFC билан келишув 2020 йилда эришилган эди.

“Бугун мен сизга уч йиллик қўшма инвестиция дастурини тақдим этдим, унинг умумий қиймати 34 миллиард долларни ташкил этади. Бу — жуда йирик, стратегик аҳамиятга эга лойиҳалардир. Бу ҳақда биз сиз билан Нью-Йоркда ҳам гаплашган эдик, ва бугун яна таъкидлаб ўтдим. Шундай экан, олдинда катта истиқболлар бор.

Яна бир бор миннатдорлик билдираман. Мен ишонаманки, бугунги саммит натижалари тарихий аҳамиятга эга бўлади. Сизнинг Марказий Осиё ва Америка Қўшма Штатларига бўлган муносабатингиз, диққат-эътиборингиз — ҳамкорлигимиз мустаҳкамланиб бораётганининг ёрқин ифодасидир”, деди Ўзбекистон етакчиси.

У C5+1 формати амалий ҳаракатнинг самарали механизмига айланиши кераклигини қайд этган ҳолда, кейинги саммитни 2026 йилда Самарқанд шаҳрида — бу форматга асос солинган масканда ўтказишни таклиф қилди.

“Ишонаманки, сизнинг етакчилигингиз остида ҳамкорлигимиз барқарор ривожланиб боради. Мен сизга “Тинчлик саммити”ни ўтказиш таклифини бердим ва биз бу ташаббусга жиддий тайёргарлик кўрамиз”, деди Мирзиёев.

Президент Дональд Трамп раислигида ўтган тадбирда Қозоғистон Республикаси Президенти Қосим-Жомарт Тўқаев, Қирғиз Республикаси Президенти Садир Жапаров, Тожикистон Республикаси Президенти Имомали Раҳмон ва Туркманистон Президенти Сердар Бердимуҳамедов ҳам қатнашди.