Миржалол Қосимов “Барсeлона” афсоналарига қарши ўйнамайдиган бўлди

Аввалроқ ўзбекистонлик таниқли собиқ футболчи, Олмалиқнинг ОКМК футбол клуби мураббийи Миржалол Қосимов “Барселона” ва Марказий Осиё футбол афсоналари ўртасидаги ўртоқлик учрашувида иштирок этиши ҳақида хабар берган эдик. Буни ҳатто Испания клуби ахборот хизмати ҳам тасдиқлаганди. Бироқ ОКМКнинг тур ўйинлари бошланиб қолгани сабаб, мазкур нуфузли  мусобақа Қосимовнинг иштирокисиз ўтадиган бўлди. Бу ҳақда Ўзбекистон футбол ассоциацияси вице-президенти Равшан Эрматов QALAMPIR.UZ'га маълум қилди. 

Вице-президентнинг айтишича, Миржалол Қосимов бошчилигидаги ОКМК клубининг тур ўйинлари бошланиб қолгани сабаб “Барселона” ва Марказий Осиё футбол афсоналари ўртасидаги ўртоқлик учрашувида иштирок эта олмайди. Унинг ўрнига Биродар Абдураимов ва Сервер Жепаровлар иштирок этиши кутилмоқда. 

Мазкур ўйин жорий йилнинг 30 август куни Қирғизистоннинг Бишкек шаҳрида бўлиб ўтиши режалаштирилган. Ушбу баҳсда “Барса”нинг собиқ футболчилари: Роналдиньо, Ривалдо, Карлес Пуёл, Хавер Савиола, Роналд де Бур, Жулиано Белетти, Франческо Кокулар ва бошқалар иштирок этади.

“Осиё афсоналари” таркибида эса Ҳидетоши Наката, Андрей Канчелскис, Муҳсин Муҳаммадиев ва бошқалар майдонга тушиши кутилмоқда. 

Шунингдек, учрашувни FIFA'нинг энг яхши собиқ ҳакамларидан бири ва жаҳон чемпионатлари тарихида бош ҳакам сифатида ўтказилган ўйинлар сони бўйича рекорд (11 та) натижа қайд этган ўзбекистонлик Равшан Эрматов бошқариб боради.