Месси терма жамоадаги фаолиятини якунлади – ОАВ

Аргентиналик ҳужумчи Лионель Месси миллий терма жамоадаги сўнгги ўйинини ўтказганини жамоадошларига маълум қилди. Бу ҳақда журналист Эрнан Кастильо ижтимоий тармоғида маълум қилди.

Манбага кўра, Месси Жаҳон чемпионати финалида Испанияга қарши ўйиндан сўнг кийиниш хонасида нутқ сўзлаган ва терма жамоада бошқа ўйнамаслигини маълум қилган. Аргентина терма жамоаси мазкур учрашувда қўшимча вақтда 0:1 ҳисобида мағлуб бўлганди.

39 ёшли футболчи 2023 йилдан буён MLS вакили “Интер Майами” клуби сафида тўп тепиб келмоқда. У Европада “Барселона” ва “Пари Сен-Жермен” клублари шарафини ҳимоя қилган.

Месси “Барселона” билан тўрт марта Чемпионлар лигаси, уч марта UEFA Суперкубоги ва уч марта клублар ўртасидаги жаҳон чемпионатида ғолиб чиққан.

Аргентина терма жамоаси сафида у 2022 йилги Жаҳон чемпионати ғолиби бўлган, 2014 ва 2026 йилларда эса мундиаль финалига қадар етиб борган. Шунингдек, Месси 2008 йилги Олимпиада чемпиони ҳамда 2021 ва 2024 йилларда ўтказилган Америка Кубоги ғолиби ҳисобланади.

Лионель Месси саккиз марта “Олтин тўп”ни қўлга киритиб, ушбу мукофотни энг кўп олган футболчи сифатида рекорд ўрнатган.

Эслатиб ўтамиз, аввалроқ Аргентина футбол ассоциацияси Жаҳон чемпионати финалидан сўнг Мессига атаб таъсирли мурожаат йўллаганди.