Аргентина терма жамоаси Мессига таъсирли мурожаат йўллади

Аргентина терма жамоаси 2026 йилги Жаҳон чемпионати финалидаги мағлубиятдан сўнг жамоа сардори Лионель Мессига бағишланган таъсирли мурожаатни эълон қилди. 

Аргентиналиклар финалда Испанияга қўшимча вақтда 0:1 ҳисобида мағлуб бўлиб, 2022 йил Қатарда қўлга киритилган жаҳон чемпионлиги унвонини ҳимоя қила олмади.

“Сенинг кўз ёшларинг — бизнинг ҳам кўз ёшларимиз, капитан. Сен бизга ҳаётимиздаги энг бахтли онларни тақдим этдинг. Фидойилигинг, сеҳринг ва сўнгги сониягача курашганинг учун раҳмат. Биз сени абадий севамиз, Лео!”  дейилади мурожаатда.

39 ёшли Месси Жаҳон чемпионатининг кумуш медалини қабул қилиб олгач, трибунадаги аргентиналик мухлислар олдига борди ва ҳиссиётларини яшира олмай, кўз ёши тўкди.

Бу Мессининг фаолиятидаги олтинчи ва эҳтимол сўнгги Жаҳон чемпионати бўлди. Навбатдаги мундиаль 2030 йилда ўтказилади. Ўша вақтга келиб аргентиналик юлдуз 43 ёшга тўлади.

Маълумот учун, Лионель Месси Жаҳон чемпионатидаги илк ўйинини 2006 йилда ўтказган. Шу вақтгача у мундиалларда 34 та учрашувда майдонга тушиб, 21 та гол урган ва 12 та голли узатмани амалга оширган.