Месси отасининг дафн маросимида иштирок этди (видео)

Лионель Месси ва унинг оила аъзолари Аргентинанинг Росарио шаҳри яқинида жойлашган расмий “Эль Прадо” қабристонида отаси Хорхе Мессининг дафн маросимида иштирок этди. Бу ҳақда EFE нашри хабар берди.

Манбага кўра, маросим кичик доирада ва кучайтирилган хавфсизлик чоралари остида ўтказилган. Месси бир кун аввал рафиқаси Антонела Рокуццо ва фарзандлари билан Росариога етиб келган. Кейинроқ уларга онаси Селия Куччиттини, ака-укалари Матиас ва Родриго ҳамда синглиси Мария Сол қўшилган.

Месси оиласини қўллаб-қувватлаш учун аэропорт ва қабристон олдида мухлислар ҳам тўпланган.

Маълумот учун, Хорхе Месси узоқ давом этган касалликдан сўнг жорий йилнинг 8 август куни Росариодаги шифохонада 68 ёшида вафот этди. Унинг ўлим сабаби очиқланмаган. Хорхе Месси ўғлининг профессионал фаолияти давомида унинг агенти сифатида ишлаган.

Хорхе Мессининг соғлиғи билан боғлиқ муаммолар 2026 йил июнь ойида, Жаҳон чемпионати вақтида маълум бўлган эди. Аргентина терма жамоасининг Жазоирга қарши илк учрашувидан сўнг Лионель Месси кўз ёшларини тия олмаган ва бир неча оғир кунларни бошидан кечирганини айтган. Кейинчалик футболчининг оиласи Хорхе Месси тиббий назорат остида даволанаётганини маълум қилган.