Месси мухлисларига мурожаат билан чиқди

Аргентина терма жамоаси сардори Лионель Месси 2026 йилги Жаҳон чемпионати финалидаги мағлубиятдан сўнг илк бор мухлисларга мурожаат қилди ва мусобақа давомида кўрсатилган қўллаб-қувватлов учун уларга миннатдорчилик билдирди. Бу ҳақда у ўзининг Instagram саҳифасида ёзиб қолдирди.

“Оғриқ жуда катта ва бу ярани даволаш осон бўлмайди. Лекин мен яхши хотираларни ҳам эслайман. Биз ортда қолдирган ўйинлар, бутун мамлакатнинг қўллаб-қувватлаши хотирамда абадий сақланади. Бу эса жамоанинг саъй-ҳаракатлари билан биргаликда бизга яна бир бор дунёнинг энг кучли жамоалари қаторидан ўрин олиш имконини берди. Бугун қилган ишларимизни тўлиқ қадрлаш қийин, аммо бу жамоа кетма-кет иккинчи марта Жаҳон чемпионати финалига чиқди”, деб ёзди Месси.

Шунингдек, аргентиналик юлдуз турнир давомида терма жамоани қўллаб-қувватлаган мухлисларга миннатдорлик билдириб, Испания терма жамоасини жаҳон чемпионлиги билан табриклаган.

Эслатиб ўтамиз, Аргентина 2026 йилги Жаҳон чемпионати финалида қўшимча вақтда Испанияга 0:1 ҳисобида мағлуб бўлиб, 2022 йил Қатарда қўлга киритилган чемпионлик унвонини ҳимоя қила олмади.

39 ёшли Месси мусобақа давомида 8 та гол урди ва 4 та голли узатмани амалга оширди. У турнирнинг энг сермаҳсул футболчилари рўйхатида 10 та гол ва 4 та ассист қайд этган Франция терма жамоаси ҳужумчиси Килиан Мбаппеден кейин иккинчи ўринни эгаллади.

Маълумот учун, Лионель Месси Аргентина терма жамоаси сафида жами 207 та учрашувда майдонга тушиб, 125 та гол муаллифи бўлган.