Месси MLS тарихида янги рекорд ўрнатди

Аргентиналик футбол юлдузи Лионель Месси терма жамоа йиғинига чақирилганига қарамай “Интер Маями” ва “Атланта Юнайтед” жамоалари ўртасидаги учрашувда майдонга тушди. Учрашувда Месси дубль қайд этиб, MLS тарихида янги рекорд ўрнатди. Бу ҳақда AS нашри хабар берди.

Месси ушбу натижа билан бир мавсумда 9 та ўйинда камида 2 та гол урган MLS тарихидаги биринчи футболчига айланди. Бу ўйинларнинг бештаси кетма-кет ўтказилган бўлиб, бу ҳам ўзига хос натижадир.

Месси Аргентина терма жамоасининг сўнгги йиғинига чақирилганига қарамай “Атланта Юнайтед”га қарши ўйинда майдонга тушди. У Аргентина ва Венесуэла ўртасидаги ўртоқлик ўйинида иштирок этмагани учун “Интер Маями”га қайтиш имконига эга бўлди.

Жамоа бош мураббийи Хавьер Маскерано бу борада шундай деди:

“Ўйиндан олдин мен Скалони билан гаплашдим, у Мессидан фойдаланмаслигини айтди. Шундан сўнг Лео билан гаплашдим, у ўйнашга тайёрлигини билдирди. У машғулот ўтказмаган бўлса ҳам, ўз маҳоратини яна бир бор кўрсатди ва ғалабага ҳисса қўшди”, дейди Маскерано.

Маълумот учун, Месси жорий мавсумда MLS доирасидаги 27 учрашувда 26 та гол урди ва 18 та голли узатма берди.  

Эслатиб ўтамиз, аввалроқ Мессининг жамоадошлари Серхио Бускетс ва Жорди Альба мавсум якунида фаолиятни якунлашини эълон қилган эди.

Диёр Тошпўлатов