“Барселона”нинг яна бир афсонаси фаолиятини якунлаяпти

“Интер Майами” клуби ҳимоячиси ва “Барселона” афсонаси Жорди Альба MLS мавсуми якунида профессионал футболчилик фаолиятини якунлашини маълум қилди. Бу ҳақда футболчи ўзининг Instagram саҳифасида хабар берди.

36 ёшли футболчи жорий MLS мавсуми якунида футболдан кетишини айтиб ўтди. Альба “Ла Масиа” тизимида тарбия топган ва 2012 йилда “Валенсия”дан “Барселона”га қайтган эди. Каталония клубида ўтган 11 йил давомида у Лионель Месси билан бирга жаҳон футболининг энг самарали дуэтларидан бирини шакллантирди. Уларнинг тандеми орқали “Барселона” кўплаб ғалабаларга эришди.

Альбанинг клублар миқёсидаги ютуқлари орасида олтита Ла Лига чемпионлиги, бешта Испания Қироллик кубоги, тўртта Испания Суперкубоги, бир марта Чемпионлар лигаси, бир марта UEFA Суперкубоги ва клублар ўртасидаги жаҳон чемпионати ғалабаси бор.

Испания терма жамоаси сафида у Европа чемпионати ва Миллатлар лигаси ғолибига айланган.

2023 йилда Альба “Барселона”ни тарк этган Месси ва Бускетс билан биргаликда “Интер Майами” жамоаси сафига қўшилиб, биринчи йилидаёқ Лигалар кубогини қўлга киритган эди. Энди эса у яқин дўсти Бускетс билан бирга ажойиб ва шонли карьерасига якун ясайди. Кўплаб футбол мутахассисларнинг фикрича, Жорди Альбанинг фаолияти футбол тарихида садоқат, барқарорлик ва юқори даражадаги маҳорат намунаси сифатида эсда қолади.

Маълумот учун, у фаолияти давомида 793 та ўйинда майдонга тушган ва 60 та гол ва 175 та ассистни ўз номига расмийлаштирган.

Эслатиб ўтамиз, аввалроқ Жорди Альбанинг жамоадоши, собиқ “Барселона” футболчиси Серхио Бускетс ҳам MLS мавсуми якунида футболчилик фаолиятини якунлашини эълон қилган эди.