Мелиқўзиевнинг навбатдаги жанги тафсилотлари маълум бўлди

Жаҳон бокс ассоциацияси (WBA) версияси бўйича супер ўрта вазн тоифасидаги чемпионлик камари учун мажбурий даъвогар, ўзбекистонлик боксчи Бектемир Мелиқўзиев жорий йилнинг 6 ноябрь куни БААнинг Дубай шаҳрида рингга кўтарилади. Бу ҳақда “Muka Boxing Promotions” хабар берди.

Мелиқўзиевнинг рақиби тожикистонлик Кароматулло Шарипов бўлади. Жанг “Ники Бич арена” майдонида ўтказилади. Ушбу беллашув ўзбекистонлик боксчи учун чемпионлик жанги олдидан сўнгги тайёргарлик босқичи бўлиши кутилмоқда.

Аввалроқ, WBA амалдаги жаҳон чемпиони, мексикалик Хайме Мунгияга Никита Цзюга қарши ихтиёрий ҳимоя жангида иштирок этишга рухсат берган эди.

WBA қарорига кўра, мазкур жангдан кейин Мунгия жамоаси мажбурий даъвогар мақомида турган Бектемир Мелиқўзиев билан чемпионлик камари учун беллашув бўйича музокараларни дарҳол бошлаши керак.

Маълумот учун, Бектемир шу кунгача профессионал боксда 18 та жанг ўтказиб, уларнинг 17 тасида ғалаба қозонган. Шарипов эса 8 та жанг ўтказиб, уларнинг 4 тасида ғалаба қозонган, 3 та жангда мағлуб бўлган. 1 та жангда эса дуранг қайд этган.