Мексикадаги Жаҳон кубоги бекор қилинди

Халқаро сув спорти федерацияси Мексикада ўтказилиши режалаштирилган шўнғиш бўйича Жаҳон кубоги босқичи бекор қилинганини расман эълон қилди. Бу ҳақда федерация матбуот хизмати маълум қилди.

Билдирилишича, жорий йилнинг 22 февраль куни “Халиско – янги авлод” гиёҳванд моддалар картели етакчиси Немесио Осегуэра Сервантеснинг (лақаби “Эль Менчо”) ўлдирилишидан сўнг Мексиканинг бир нечта ҳудудларида, жумладан, Гвадалахарада ҳам тартибсизликлар бошланган. 

Намойишчилар полицияга ҳужум қилган, автомобилларга ўт қўйилган ва дўконлар талон-торож қилинган. Расмийлар “қизил код” эълон қилиб, аҳолини уйда қолишга чақирган. Мамлакат аэропортларида 100 дан ортиқ рейс бекор қилинган.

Халқаро сув спорти федерацияси Мексика сув спорти федерацияси ва маҳаллий ҳокимият билан маслаҳатлашган ҳолда мусобақани бекор қилишга қарор қилган. Турнир жорий йилнинг 5-8 март кунлари Сапопан шаҳрида ўтказилиши режалаштирилган эди.

Федерация расмий баёнотида ушбу қарор Халиско штатидаги вазиятни ҳар томонлама ўрганиш натижасида қабул қилингани таъкидланган. 

“Сув спорти мусобақаларидаги барча иштирокчиларнинг хавфсизлиги биз учун устувор вазифа бўлиб қолади”,  дейилади баёнотда.

Шунингдек, федерация мексикалик ҳамкорларига тайёргарлик жараёнидаги ёрдами учун миннатдорлик билдириб, келгусида сув спорти бўйича йирик мусобақани Сапопан шаҳрида ўтказишга умид билдирган. Бироқ Жаҳон кубогининг янги сана ҳозирча эълон қилинмаган.