Мексикада собиқ вазир 38 йилга қамалди
Олам
−
17 Октябрь 1931
Мексиканинг собиқ жамоат хавфсизлиги вазири, наркокартелларга қарши курашга бошчилик қилган Женаро Гарсия Луна АҚШда наркотик савдогарларидан пора олганликда айбланиб, 38 йил қамоқ жазосига ҳукм қилинди. Бу ҳақда “The Guardian” хабар берди.
Нашрнинг ёзишича, Гарсия Луна Мексика ҳуқуқни муҳофаза қилиш органларида раҳбарлик лавозимларида ишлаган. Хусусан, 2001 йилдан 2006 йилгача у Федерал тергов агентлигини бошқарган, сўнгра олти йил давомида Жамоат хавфсизлиги вазири бўлган. Собиқ амалдор коррупцияга қарши кураш билан ном қозонган. Хусусан, у ушбу мавзуда бир нечта китоб ёзган.
Гарсия Луна истеъфога чиққач, АҚШга кўчиб ўтган ва 2019 йилда наркокартеллардан, жумладан, машҳур “Синалоа” картели етакчиси Хоакин Гусмандан пора олганликда айбланиб, ҳибсга олинган.
Прокуратура собиқ мулозимни умрбод қамоққа ҳукм қилишни талаб қилган, аммо суд 38 йил қамоқ жазоси билан чекланган. Ўз навбатида, Гарсия Лунанинг адвокатлари наркокартел аъзолари уларнинг ҳимоясидаги шахсга туҳмат қилганини таъкидлаб, фақат 20 йиллик қамоқ жазоси етарли бўлишини даъво қилган. Бироқ, суд ҳукми ўзгаришсиз қолган.
Эслатиб ўтамиз, аввалроқ Мексиканинг Халиско штатида бир ойдан ортиқ вақт давомида картеллар ва қудратли тузилмалар ўртасидаги тўқнашувлар ҳамда вандаллик ҳаракатлари фонида Лагос-де-Морено ва Сан-Луис Потоси шаҳарлари ўртасидаги йўлда бешта бошсиз жасад топилган эди.
Live
Барчаси
