Медведев 30 минг мигрант Россияга ноқонуний киришга уринганини айтди  

2024 йилнинг 1 декабридан буён Россияга сохта ҳужжатлар билан киришга уринган ва кириши чекланган тахминан 30 минг хорижий фуқаро аниқланди. Бу ҳақда кеча, 17 июль куни Россия Хавфсизлик Кенгаши раиси ўринбосари Дмитрий Медведев идоралараро комиссия йиғилишида маълум қилди.

Учрашувда хорижий фуқароларнинг кириш-чиқишига доир янги тартибларнинг синови муҳокама қилинган. 

“Эксперимент бошланганидан бери реал вақт режимида 4 миллиондан ортиқ хорижликларнинг биометрик маълумотлари йиғилди ва текширилди”, деган Медведев. 

Унга кўра, ушбу текширилган фуқаролардан 30 мингдан ортиғи ноқонуний равишда Россияга кирмоқчи бўлган. 

“30 мингдан ортиқ шахс аниқланиб, уларнинг сохта ҳужжатлар тақдим этгани, кириш тақиқлари борлиги ёки қидирувда экани маълум бўлди”, деган Хавфсизлик Кенгаши раисининг ўринбосари. 

Эслатиб ўтамиз, аввалроқ Россиянинг Калининград вилоятида ҳужжатларни сохталаштириб, 110 нафар мигрантни ноқонуний рўйхатга қўйган ўзбекистонликларга жиноят иши қўзғатилганди.