Мбаппе ёзда “Реал”ни тарк этиши мумкин

Франциялик ҳужумчи Килиан Мбаппе жорий мавсум якунлангач дарҳол “Реал Мадрид”ни тарк этиши мумкин. Бу ҳақда журналист Педро Алмейда хабар берди.

Манбага кўра, мадридликлар Мбаппени жамоани режалаштирилган қайта кўриб чиқиш жараёнида трансферга қўйилиши мумкин бўлган футболчилар рўйхатига киритган. 

Якуний қарор ҳали қабул қилинмаган, бироқ клуб мавсум якунлангандан сўнг таркибни янгилаш вариантларини жиддий кўриб чиқмоқда.

Француз юлдузининг элита даражасидаги мавқеи ҳисобга олинса, бу хабар футбол оламида катта шов-шувга сабаб бўлади. Мбаппенинг “Реал Мадрид”га трансфери сўнгги йиллардаги энг шов-шувли битимлардан бири бўлган ва у клубнинг асосий ҳужумчисига айланиши кутилганди.

Шунингдек, Жозе Моуриньо “Реал Мадрид”нинг эҳтимолий кейинги мураббийи сифатида тилга олинмоқда. Бироқ бу вариант фақат бир шарт билан кўриб чиқилиши мумкин – португалиялик мутахассисга таркибни тўлиқ шакллантириш эркинлиги берилиши, яъни ҳеч бир футболчининг юлдуз мақоми унинг қарорларига таъсир қилмаслиги керак.

Маълумот учун, жорий мавсумда Мбаппе Ла Лигада 24 та гол, Чемпионлар лигасида эса 15 та гол уришга эришди.

Эслатиб ўтамиз, аввалроқ “Реал Мадрид” мухлислари франциялик ҳужумчи Килиан Мбаппенинг клубни тарк этишини талаб қилиб петиция бошлагани ва бу атиги бир кун ичида 12 миллиондан ортиқ имзо тўплагани ҳақида хабар берилганди. Ҳозирга келиб ушбу петиция 70 миллиондан кўп овоз тўплади.