Mbappe yozda “Real”ni tark etishi mumkin

Fransiyalik hujumchi Kilian Mbappe joriy mavsum yakunlangach darhol “Real Madrid”ni tark etishi mumkin. Bu haqda jurnalist Pedro Almeyda xabar berdi.

Manbaga ko‘ra, madridliklar Mbappeni jamoani rejalashtirilgan qayta ko‘rib chiqish jarayonida transferga qo‘yilishi mumkin bo‘lgan futbolchilar ro‘yxatiga kiritgan. 

Yakuniy qaror hali qabul qilinmagan, biroq klub mavsum yakunlangandan so‘ng tarkibni yangilash variantlarini jiddiy ko‘rib chiqmoqda.

Fransuz yulduzining elita darajasidagi mavqei hisobga olinsa, bu xabar futbol olamida katta shov-shuvga sabab bo‘ladi. Mbappening “Real Madrid”ga transferi so‘nggi yillardagi eng shov-shuvli bitimlardan biri bo‘lgan va u klubning asosiy hujumchisiga aylanishi kutilgandi.

Shuningdek, Joze Mourino “Real Madrid”ning ehtimoliy keyingi murabbiyi sifatida tilga olinmoqda. Biroq bu variant faqat bir shart bilan ko‘rib chiqilishi mumkin – portugaliyalik mutaxassisga tarkibni to‘liq shakllantirish erkinligi berilishi, ya’ni hech bir futbolchining yulduz maqomi uning qarorlariga ta’sir qilmasligi kerak.

Ma’lumot uchun, joriy mavsumda Mbappe La Ligada 24 ta gol, Chempionlar ligasida esa 15 ta gol urishga erishdi.

Eslatib o‘tamiz, avvalroq “Real Madrid” muxlislari fransiyalik hujumchi Kilian Mbappening klubni tark etishini talab qilib petitsiya boshlagani va bu atigi bir kun ichida 12 milliondan ortiq imzo to‘plagani haqida xabar berilgandi. Hozirga kelib ushbu petitsiya 70 milliondan ko‘p ovoz to‘pladi.