Мбаппе Франциянинг мағлубияти сабабларини айтди

Франция терма жамоаси сардори ва ҳужумчиси Килиан Мбаппе Испанияга қарши Жаҳон чемпионатининг ярим финалида жамоаси режалаштирган ўйинни намойиш эта олмаганини тан олди. Бу ҳақда Мбаппе ўйиндан кейинги журналистларга берган интервьюсида сўз очди.

Бугун, 15 июль куни Испания терма жамоаси Жаҳон чемпионатининг ярим финалида Францияни 2:0 ҳисобида мағлуб этган эди. Ғолиб жамоа сафида Микель Оярсабаль 22-дақиқада пенальтидан, Педро Порро эса 58-дақиқада гол урди.

“Биз техник ва тактик жиҳатдан режалаштирган ўйинимизни кўрсата олмадик. Жаҳон чемпионати ярим финалида қилиниши лозим бўлган ишларни бажармасангиз, ғалаба қозона олмайсиз”, дейди Мбаппе.

Франция сардорининг сўзларига кўра, Испания ўз услубидан воз кечмаган.

“Испания ўз ўйин режасига содиқ қолди. Улар тўпни назорат қилишни ва ўйин темпини бошқаришни яхши кўради. Бизнинг режамиз уларга юқори босим ўтказиб, ўз ритмини ўрнатишига йўл қўймаслик эди.”

Мбаппенинг таъкидлашича, французлар тўпни қайтариб олган вазиятларда ҳам етарлича сифатли ҳаракат қила олмаган.

“Тўпни қайтариб олганимиздан кейин ҳам биринчи тегинишларимиз талаб даражасида бўлмади. Бундай ҳолатлар мағлубиятга олиб келади. Бу катта умидсизлик. Аммо холисона айтадиган бўлсам, бизда финалга чиқиш учун барча зарур шарт-шароитлар мавжуд эмас эди”, деди Франция терма жамоаси сардори.

Эслатиб ўтамиз, Жаҳон чемпионатининг иккинчи ярим финалида бугун, 15 июль куни Англия ва Аргентина терма жамоалари ўзаро баҳс олиб боради. Турнир финали эса 19 июль куни ўтказилади.