Мактабдаги отишмада уч киши ҳалок бўлди

Бугун, 22 июнь куни Филиппиннинг марказий қисмидаги ўрта мактабда икки нафар ўқувчи қуролли ҳужум уюштириши оқибатида уч киши ҳалок бўлди, яна етти киши яраланди. Бу ҳақда “Associated Press” хабар берди.

Маълум қилинишича, 14 ва 15 ёшли икки ўқувчи бугун, 22 июнь куни эрталаб Таклобан шаҳридаги San Jose National High School мактабида ўқотар қуроллардан фойдаланган ҳолда ўт очган. Минтақавий полиция бошлиғи Жейсон Капойнинг айтишича, ҳужум қилганлар ҳам, қурбонлар ҳам мазкур мактаб ўқувчилари бўлган.

Гумондорлар воқеадан сўнг қўлга олинган. Дастлабки сўроқларда гумондорлар мактабда мунтазам таҳқирлаш ва зўравонликка учраганликларини билдирган. Бироқ полиция бу борада қўшимча маълумот бермаган.

Қайд этилишича, гумондорларнинг аввал судланмаганлиги аниқланган. Шунингдек, улар ҳужумда ишлатилган 9 миллиметрли тўппонча ва 38 калибрли револьверни қаердан олгани ҳозирча номаълум.

Полиция маълумотларига кўра, мактабда бир вақтнинг ўзида бир нечта кириш ва чиқиш жойларини назорат қилаётган фақат битта қўриқчи бўлгани сабабли ўқувчилар қуролларни мактаб ҳудудига олиб киришга муваффақ бўлган.

“Гумондорлар дастлаб бир синфхонага бостириб кирган. Отишмадан кейин болалар қочиб кетган ва ҳужумчилар айрим жабрланувчиларни қувиб, бошқа хонага ҳам кирган кўринади”, дейди Капой.

Полиция раҳбарининг сўзларига кўра, ҳалок бўлган ва яраланганларнинг аксарияти қиз ўқувчилар бўлган. Гумондорлардан бири ҳужумдан кейин мактаб ҳудудида қўлга олинган. Иккинчиси эса қочиб, яқин атрофдаги уйга яширинган. Маҳаллий аҳоли хабари асосида полиция уни ҳам топиб ҳибсга олган.

Филиппин президенти Фердинанд Маркос кичик воқеа юзасидан ҳар томонлама тергов ўтказишни буюрган ҳамда барча мактаблар, иш жойлари ва жамоат масканларида хавфсизлик чораларини кучайтиришни топширган.

“Президент бу воқеадан чуқур қайғуга тушди. Айниқса, қурбонларнинг ота-оналари учун бу жуда оғир ва даҳшатли ҳолат”, дейди Президент коммуникациялари бўйича котиб ўринбосари Клер Кастро.

Филиппин миллий полицияси фуқароларни хотиржамликни сақлашга ва терговга ёрдам бериши мумкин бўлган ҳар қандай маълумотни ҳуқуқ-тартибот органларига етказишга чақирган.

Эслатиб ўтамиз, аввалроқ Россиянинг Краснодар ўлкасидаги туманларидан бирида жойлашган мактабда отишма юз берган эди. Тўққизинчи синф ўқувчиси таълим муассасасига пневматик қурол олиб кирган.