Макроннинг қароргоҳида тинтув ўтказилди

Франциянинг Париж шаҳридаги Елисей саройи – Франция президенти қароргоҳида коррупция иши доирасида тинтув ўтказилди. Бу ҳақда “Le Monde” хабар берди.

Тергов “Shortcut Events” компанияси билан боғлиқ бир нечта давлат шартномаларини ўрганишга қаратилган. Ушбу компания йирик давлат тадбирларини ташкил этиш билан шуғулланган.

Хабарда айтилишича, тергов бевосита Эммануэль Макронни қамраб олмайди.

Аввалроқ, 14 апрель куни терговчилар президент қароргоҳини ҳам тинтув қилишга уринган, бироқ ўша пайтда маъмурият Франция Конституциясининг 67-моддасига таянган ҳолда бунга рухсат бермаган. Кейинчалик эса Франция миллий молиявий прокуратураси тинтув ўтказишга рухсат олган.

Тергов 22 йил давомида “Shortcut Events” компаниясидавлат маросимларини ташкил этиш бўйича деярли барча шартномаларни ютиб келгани аниқланганидан кейин бошланган. Шунингдек, 2024 йилда Нормандиядаги Омаҳа соҳилида иттифоқчилар қўниши хотирасига бағишланган 80 йиллик тадбирлар ҳам шу компания томонидан ташкил этилган.

Компания ушбу шартномаларни коррупция йўли билан олган бўлиши мумкинлиги гумон қилинмоқда. Тинтувлар фақат Елисей саройида эмас, балки компания офисларида ва давлат буюртмачиси бўлган Миллий ёдгорликлар марказида ҳам ўтказилган.

Эслатиб ўтамиз, аввалроқ Испания собиқ бош вазири Хосе Луис Родригес Запатеро COVID-19 пандемияси даврида хусусий авиакомпанияни “инқироздан қутқариш” учун пора олганликда ва бошқа тегишли жиноятларда айбланиб тергов қилинаётгани ҳақида хабар берилганди.