Макрон илк бор давлат ташрифи билан Британияга борди

Қирол Чарльз III бугун, 8 июль куни Франция Президенти Эммануэль Макронни Буюк Британияда кутиб олди – бу Брекситдан сўнг Европанинг етакчи сиёсатчилари томонидан амалга оширилган илк расмий давлат ташрифидир. Улар ўртасидаги илиқ учрашув икки давлат муносабатларининг яқинлашаётганини рамзий ифода этди. Бу ҳақда “Reuters” хабар берди.

Макрон илк бор Британияда давлат ташрифи билан қабул қилинди. У қирол билан шахсан яқин муносабатга эга ва ҳар икки етакчи ўз рафиқалари – Брижит Макрон ва қиролича Камилла ҳамроҳлигида бир-бирини табассум билан қарши олди. Уларни отлиқ аскарлар анъанавий зариф либосда кузатиб турди.

Қирол Чарльз III кечқурун Виндзор қасридаги давлат зиёфатида сўзлайдиган нутқида икки мамлакат дуч келаётган “кўп қиррали мураккаб таҳдидлар”га урғу бериши кутилмоқда. Макрон эса X (аввалги Twitter) ижтимоий тармоғида Британияга келганини эълон қилар экан, шундай ёзди: “Биз биргаликда барпо этишимиз мумкин бўлган жуда кўп нарсалар бор”.

Ташриф бошида икки мамлакат Франциянинг ядровий энергетика компанияси EDF томонидан Шарқий Англияда атом электр станцияси қурилиши учун 1,1 миллиард фунт (1,5 миллиард доллар) инвестиция киритилишини эълон қилди.

Виндзорда қирол Чарльз, шаҳзода Уильям ва рафиқаси Кэтрин билан бирга от аробаларида расмий маросимда қатнашди. Бу юриш Виндзор қасрининг ҳовлисида якунланди.

Британияда ўтган йили Кир Стармер бошчилигидаги марказчавий-чап Лейбористлар партияси ҳокимиятга қайтгач, Лондон Европадаги иттифоқчилари билан муносабатларни қайта тиклашга интилмоқда. Қирол Чарльз эса Макрон ташрифи сиёсий музокаралари олдидан ташриф муҳитини яратишда асосий ўрин тутмоқда.

76 ёшли монарх, ҳозирда саратонга қарши даволанишни давом эттираётган бўлса-да, давлат зиёфатида шундай дейиши кутилмоқда:

“Икки миллатимиз нафақат умумий қадриятларга эга, балки уларни дунё бўйлаб амалда татбиқ этишда чарчамасдан ҳаракат қилади”.

Макроннинг ушбу уч кунлик ташрифи иқтисодий ва ташқи сиёсат масалаларига бағишланган. Бироқ ташрифнинг биринчи куни – маросимларга ва рамзий маъноларга бой. Бу Франция президенти Николя Саркози 2008 йили марҳум қиролича Елизавета томонидан қабул қилинганидан сўнг ўтаётган илк давлат ташрифидир.

Қирол Чарльз Макронни кутиб олган пайтда унинг ўнг кўзи қизаргани яққол кўринган. Бу ҳақда Букингем саройи манбаси шундай деди: 

“Бу саратон билан боғлиқ эмас, балки кўздаги қон томир ёрилиши натижасида юзага келган.”

Макрон бугун марказий Лондондаги Британия парламентида чиқиш қилиши кутилмоқда. Кейинчалик у Виндзорга қайтиб, қирол Чарльз иштирокидаги давлат зиёфатида нутқ сўзлайди. У ерда тахминан 150 нафар меҳмон қатнашади.

Миграция масалалари

Макрон ва Буюк Британия Бош вазири Стармер ташрифнинг кейинги босқичларида бир қатор масалалар, жумладан одам савдосини тўхтатиш ва иқтисодий ҳамда мудофаа соҳасидаги ҳамкорликни яхшилаш юзасидан музокаралар ўтказиши кутилмоқда. Бу музокаралар АҚШ Европадаги хавфсизлик кафолатчиси сифатидаги анъанавий ролини пасайтириб бораётган шароитда ўтмоқда.

Брекситдан кейинги муносабатлар, жумладан Канал орқали қочқинларнинг резина қайиқларда ўтиши борасида муаммолар бўлган бўлса-да, Британия ва Франция Украина учун шартли равишда умумий ҳарбий куч ташкил этиш устида ҳамкорлик қилмоқда.

Британия расмийлари Макрон қочқинларни қайтариш бўйича пилот лойиҳага рози бўлишига умид қилмоқда. Бу тизимга кўра, Британия бир ноқонуний қочқинни Францияга қайтариши, эвазига Франциядан Британияда қолишга ҳақли бўлган бошқа бир қочқинни қабул қилиши мумкин. Бу модел одам савдоси билан шуғулланувчи тўдаларнинг иш усулини издан чиқариши мумкин.

Жорий йилнинг биринчи ярмида Франциядан Британияга кичик қайиқларда келган қочқинлар сони рекорд даражага етди.

Британияда Кир Стармер етакчилигидаги Лейбористлар партияси рейтингда ўнгчи "Reform UK" партияси ортидан қолмоқда. Шу боисдан у миграция муаммосига қатъий ечим таклиф қилиш учун қаттиқ босим остида турибди.

Франция эса бунгача бундай икки томонлама келишувга қарши чиқиб, Британиянинг Европа Иттифоқининг барча давлатлари билан умумий шартнома имзолаши кераклигини билдирган.