Макрон АҚШнинг Ғазо бўйича режасини қўллаб-қувватлади

Франция Президенти Эммануэль Макрон Ғазода гаровга олинганларнинг озод этилишини ва доимий ўт очишни тўхтатишни кутаётганини таъкидлаган ҳолда АҚШнинг кенг қамровли келишув тузиш таклифини қўллаб-қувватлашини билдирди. Бу ҳақда у ўзининг X ижтимоий тармоғидаги саҳифасида ёзиб қолдирди.

Франция раҳбари икки давлатнинг тинч-тотув яшаши асосида Фаластин-Исроил можаросини ҳал қилишда гаровга олинганларнинг озод этилишини, тинчлик ва тараққиётга эришиш учун доимий ўт очиш тўхтатилиши зарурлигини айтди.

Маълумот учун, АҚШ Президенти Жо Байден 31 май куни Ғазо сектори атрофидаги тарангликни бартараф этиш бўйича уч босқичли режани тақдим этганди. АҚШ Президентининг сўзларига кўра, биринчи босқич олти ҳафта давом этади. У тўлиқ ўт очишни тўхтатишни, Исроил қўшинларини Ғазонинг барча аҳоли пунктларидан олиб чиқиб кетишни, бир қатор гаровга олинганларни, жумладан, аёллар, қариялар, ярадорларни озод қилишни ўз ичига олади. Олти ҳафталик сулҳ давомида Исроил ва ҲАМАС келишувнинг иккинчи босқичига ўтиш учун бажарилиши керак бўлган шартларни муҳокама қилиши кутилмоқда.

Битимнинг иккинчи босқичи “барча тирик қолган гаровга олинганларни, шу жумладан эркак аскарларни ҳам озод қилиш”, Исроил қўшинларини Ғазо секторидан олиб чиқиб кетиш ва “доимий ўт очишни тўхтатиш”ни ўз ичига олади. 

Келишувларнинг учинчи босқичи Ғазо секторини реконструкция қилиш, шунингдек, барча ҳалок бўлган ҲАМАС гаровга олинганларнинг қолдиқларини яқинларига топширишни кўзда тутади.

Эслатиб ўтамиз, Америка Қўшма Штатлари маъмурияти жорий йилнинг 26 май куни Рафаҳдаги чодир лагерида ўнлаб фаластинликларнинг ўлимига сабаб бўлган Исроил мудофаа кучларининг зарбаси АҚШ Президенти Жо Байденнинг қизил чизиғини бузган ёки йўқлигини текшираётганлиги ҳақида хабар берилганди.