Макгрегор жароҳат сабаб бир йилга сафдан чиққани маълум бўлди

UFC собиқ чемпиони, ирландиялик Конор Макгрегор америкалик Макс Холлоуэйга қарши жангда олган оғир жароҳати туфайли камида бир йил октагонга қайта олмайди. Бу ҳақда UFC президенти Дана Уайт матбуот анжуманида маълум қилди.

“Макгрегор бир йилга сафдан чиқди”, дейди Дана Уайт.

Аввалроқ, Лас-Вегасда ўтган UFC турнирида Макгрегор Макс Холлоуэйга мағлуб бўлган эди. Ирландиялик жангчи жангнинг дастлабки сонияларида тиззасидан жароҳат олди ва 65-сонияда техник нокаут орқали мағлубиятга учради.

Жангдан сўнг, Дана Уайт Макгрегорнинг олдинги крестсимон бойлами (ACL) шикастланганини маълум қилди. Спортчининг ўзи эса ижтимоий тармоқларда жарорроҳлик амалиёти ўтказилишини тасдиқлади.

37 ёшли Макгрегор аралаш яккакурашлар (ММА)да 22 та ғалаба ва 7 та мағлубият қайд этган. У аввал UFC’нинг ярим енгил ва енгил вазн тоифаларида чемпионлик унвонларини қўлга киритган.

Эслатиб ўтамиз, Макгрегор 2024 йилнинг июнь ойида америкалик Майкл Чендлерга қарши жанг қилиши керак эди. Бироқ у машғулот пайтида оёқ бармоғини синдириб олгани сабабли беллашув бекор қилинган. Шунингдек, 2021 йил июль ойида Дастин Порьега қарши жангда ҳам ирландиялик спортчининг оёғи синган эди.