Мадуро Бруклиндаги тергов изоляторига олиб борилди (видео)

Венесуэла етакчиси Николас Мадуро Нью-Йорк шаҳридаги Бруклин туманида жойлашган тергов изоляторига олиб борилди. Келаси ҳафта у Манхэттен федерал судида гиёҳванд моддалар ва қурол контрабандаси бўйича қўйилган айбловлар юзасидан суд олдида жавоб беради. Бу ҳақда CBC News хабар берди.

Оқ уй эълон қилган видеоларда Мадуро Гиёҳванд моддалар билан курашиш бошқармаси (DEA) агентлари ёнида кетаётгани ва инглиз тилида гапиришга уринаётгани акс этган.

“Хайрли тун”, дейди у.

Сўнг у испан тилида ўзига савол беради:  “Es buenas noches, no?” яъни “Хайрли тун, шундай эмасми?” Шундан кейин у хонадаги одамларга яна “хайрли тун” дейди ва охирида “Янги йилингиз билан!” деб қўшимча қилади.

Бир кун аввал АҚШ Президенти Дональд Трамп Truth Social ижтимоий тармоғидаги саҳифасида Венесуэла етакчиси Николас Мадуронинг қўлга олинганидан кейинги илк суратини эълон қилган эди. Суратда Мадуро кулранг спорт кийимида, юзида қора ниқоб, қўлида эса сув солинган бутилка билан тасвирланган.

Сурат остида “Николас Maduro USS Iwo Jima кемаси бортида”, деган ёзув бор.

Трамп Венесуэла Президентининг қўлга олиниши ҳақида гапирар экан, Монро доктринасини эслатди. Ушбу доктрина Америка қитъасини бошқа давлатларнинг аралашуви учун ёпиқ ҳудуд деб эълон қилади. Шу пайтда, Мадуронинг қўлга олиниши ортидан мамлакатдаги ҳокимиятни вақтинча қўлга олган Венесуэла вице-президенти Делси Родригес уни зудлик билан озод қилишни талаб қилди. У давлатни ва унинг ресурсларини ҳимоя қилишга тайёр эканини маълум қилди.

Эслатиб ўтамиз, кеча, 3 январь куни АҚШ Венесуэлда махсус операция ўтказиб мамлакат Президенти Николас Мадуро ва унинг турмуш ўртоғини асир олган эди. Кейинроқ АҚШ ҳукумати ушбу операция ҳақида батафсил маълумот берди.