Мадонна, Шакира ва BTS мундиал финалини “қиздириб” беради

Жаҳон эстрада ҳонандалари Мадонна, Шакира ва K-pop юлдузлари BTS жорий йилнинг 19 июль куни Нью-Жерсидаги MetLife Stadium аренасида бўлиб ўтадиган Жаҳон чемпионати финалининг танаффус вақтидаги шоусида чиқиш қилади. Буни FIFA расман тасдиқлади.

FIFA маълумотига кўра, шоу дастурига Coldplay гуруҳи солисти Крис Мартин бошчилик қилади. Бу футбол бўйича Жаҳон чемпионати финали тарихидаги илк halftime – танаффусда намойиш этиладиган шоу бўлади. 

“Бу Жаҳон чемпионатидаги тарихий лаҳза ва дунёдаги энг катта спорт тадбирига муносиб шоу бўлади”, дейди FIFA президенти Жанни Инфантино Instagram саҳифасида.

Бу қарор 2024 йилги Копа Америка финалидаги шоуни эслатиб юборади. Ўшанда колумбиялик юлдуз Шакира Маямидаги Hard Rock Stadium’да танаффус вақтида чиқиш қилган эди. Ўтган йили MetLife Stadium ўйингоҳида бўлиб ўтган клублар ўртасидаги Жаҳон чемпионати финалида ҳам жамоалар танаффусда чиққан вақтида шоу бўлиб ўтган ва танаффус одатдаги 15 дақиқадан анча узоқ давом этган эди.

Бу катта шоу FIFA’нинг “Global Citizen Education Fund” лойиҳасини қўллаб-қувватлайди. Лойиҳа Жаҳон чемпионати давомида бутун дунёдаги болалар учун 100 миллион доллар йиғишни мақсад қилган.

Маълумот учун, ўтган ҳафта 2010 йилги мундиалнинг гимни бўлган қўшиқ “Waka Waka”ни  яратган хонанда Шакира ўзининг Instagram саҳифасида “Dai Dai” номли Бразилиядаги кўҳна Маракана стадионида суратга олинган ЖЧнинг янги расмий қўшиғи видеоролигини эълон қилганди.

Эслатиб ўтамиз, аввалроқ FIFA 2026 йилги футбол бўйича Жаҳон чемпионати финал учрашуви учун энг қиммат чипталар нархини уч баравар оширганини эълон қилганди.