Лукашенко ўғлига яна махсус стипендия тайинлади

Беларусь фуқароси Александр Лукашенконинг қарори билан унинг ўғли Николай Лукашенко яна махсус стипендия олди. Бу ҳақда “Reformation” хабар берди.

Лукашенко ушбу фармонга 2025 йил 15 июлда имзо чеккан, унда иқтидорли ўқувчилар ва талабаларни ижтимоий қўллаб-қувватлаш бўйича махсус Президент жамғармаси қарори тасдиқланган.

Имзоланган ҳужжатдан маълум бўлишича, 2024/25 ўқув йилининг иккинчи семестрида Беларусь давлат университетининг 3-босқич талабаси Николай Лукашенкога тахминан 229 Беларусь рубли (885 минг 744 сўм) миқдорида стипендия тайинланган.

Биринчи семестрда давлат раҳбарининг январь ойидаги фармонига кўра, кўрсаткич 221,88 Беларусь рублини (858 минг 205 сўм) ташкил қилган. Нашрга кўра, Лукашенконинг ўғли университетга ўқишга кирганидан бери мунтазам равишда иқтидорли талабалар учун бериладиган стипендияни олади.

Ўтган йилнинг ноябрида Николай Лукашенко ўзини отасининг мутлақ нусхаси деб атаганди. У турли мавзуларда холис фикр шакллантириш учун турли маълумотлар манбаларини ўқиб боришини айтганди ва бирор нарсага ишончи комил бўлса, ҳеч қачон жим турмаслигини таъкидлаганди. 2025 йилнинг январь ойида Александр Лукашенко унинг фарзандлари ҳатто даҳшатли тушларида ҳам ўзларини президент сифатида тасаввур қилмаслигини айтди. Унинг сўзларига кўра, мамлакатнинг бўлажак раҳбарларининг кадрлар захираси унинг икки ўғли эмас, балки “ҳозирги ҳокимлар, амалдаги вазирлар, парламент палаталари раҳбарлари, юқори лавозимли амалдорлар”дан иборат.

Эслатиб ўтамиз, 2021 йилнинг февраль ойида Беларусь раҳбари Александр Лукашенконинг тўнғич ўғли Виктор Лукашенко Олимпия ассамблеяси томонидан Беларусь Миллий олимпия қўмитаси президенти лавозимига сайланганди.