Лукашенко Си Цзиньпинга ҳайкал ўрнатишни таклиф қилди

Беларусь фуқароси Александр Лукашенко Хитой Раиси Си Цзиньпинга Беларуснинг Минск шаҳрида ҳайкал ўрнатишни таклиф қилди. Бу ҳақда БелТА ахборот агентлиги хабар берди.

Нашрга кўра, Хитой раҳбари Беларусь халқи учун совға сифатида футбол стадиони ва сузиш ҳавзаси қурган. Стадионнинг кириш қисмига Беларусь ва Хитой футболчиларини акс эттирган ҳайкал ўрнатилган.

Лукашенко ҳам стадионнинг очилиш маросимида иштирок этган. 

“Мен киришда шундай деган эдим: бу ерга менинг дўстим Си Цзиньпинга ҳайкал қўйиш керак. Чунки айнан унинг ёрдами билан, хитойликлар ўз ҳисобидан бу стадионни қуриб берди”, деган Лукашенко. 

Таъкидланишича, стадион барча халқаро стандартларга жавоб беради ва унда юқори савиядаги ўйинларни ўтказиш мумкин.

Қолаверса, жорий йилнинг 4 июнь куни Хитойнинг Пекин шаҳрида Александр Лукашенко ва Си Цзиньпин учрашуви бўлиб ўтганди. Бу учрашув Лукашенконинг 2 июндан 4 июнгача Хитойга ташрифи доирасида амалга оширилди. Беларусь Бош вазирининг биринчи ўринбосари Николай Снопков журналистларга берган интервьюсида бу ташриф ишчи ташриф эмаслиги, балки “оила ва дўстлар ўртасидаги тушлик” учун амалга оширилганини таъкидлаган.

Эслатиб ўтамиз, аввалроқ беларуслик Александр Лукашенко республикада ҳокимиятга “янги авлод” келаётгани ва у ҳокимиятда “бироз ушланиб қолганини” айтганди. Ўшанда давлат раҳбари ушбу ушланиб қолишни тажрибали сиёсатчиларни тайёрлаш муҳимлиги билан изоҳлаганди.