Трамп Путин ва Си Цзиньпин билан учрашувга тайёрлигини эълон қилди

АҚШ Президенти Дональд Трамп Россия Президенти Владимир Путин ва Хитой етакчиси Си Цзиньпин билан уч томонлама учрашувда иштирок этишга қарши эмас. Бу ҳақда у кеча, 19 октябрь куни журналистлар билан суҳбатда гапирди.

“Агар Си шундай учрашув ўтказишни хоҳласа, мен тайёрман. Украинани муҳокама қилиш учун эмас, чунки, очиғини айтганда, Россия Украинага нисбатан ўзини мутлақо нормал тутди. Биз бу учрашувни ядро қуроли ва ядровий қуролсизланишни муҳокама қилиш учун ўтказган бўлардик”, дейди АҚШ Президенти.

У Украина Президенти Владимир Зеленскийни танқид қилиб, у Россия билан низони тугатишни хоҳламаётганини ва Украина халқи номидан музокараларни бошқа биров олиб борадиган вақт келганини айтган.

Эслатиб ўтамиз, кеча, 19 октябрь куни “The Wall Street Journal” манбалари Путин Трамп ва Сига Украинани муҳокама қилиш учун уч томонлама саммит ўтказишни таклиф қилганини хабар қилганди. Путин низони Зеленскийнинг иштирокисиз, Москва учун манфаатли бўлган шартларда тугатиш бўйича келишиб олмоқчи. Пекин ҳам Трамп учрашувга рози бўлса, қаршилик қилмаслигига шама қилган.

Сўнгги ҳафталарда эса Дональд Трамп Украинага босим ўтказишни бошлади: у Россиянинг нефтни қайта ишлаш заводларига зарба беришни тўхтатишни, президентлик сайловларини ўтказишни ва Россия билан келишишни талаб қилмоқда. Трамп Россия дизель ёнилғисини АҚШга етказиб беришга рухсат берди ва Россияга қарши “жаҳаннам санкциялари”ни жорий этишдан бош тортди.