Лукашенконинг янги элчиси Саидовга ишонч ёрлиқларини топширди

Бугун, 8 февраль куни Ташқи ишлар вазири Бахтиёр Саидов Беларуснинг Ўзбекистондаги янги тайинланган элчиси Александр Огородниковдан ишонч ёрлиқларининг нусхаларини қабул қилди. Бу ҳақда вазир ўзининг Telegram-каналида ёзиб қолдирди.

Биринчи навбатда, вазир Огородниковни Ўзбекистондаги Фавқулодда ва мухтор элчи лавозимига тайинлангани билан қутлаган.

“Александр Огородников жанобларини Беларусь Республикасининг Ўзбекистондаги Фавқулодда ва мухтор элчиси лавозимига тайинлангани билан табриклаймиз”, дея ёзган вазир.

Шунингдек, у янги элчидан ишонч ёрлиқлари нусхаларини қабул қилгани ва икки ўртада келажакдаги режалар муҳокама қилинганини ҳам билдирган.

“Бугун Ташқи ишлар вазирлигида элчининг ишонч ёрлиқлари нусхаларини қабул қилдик ҳамда ҳамкорлигимизнинг устувор йўналишларини ва яқин истиқболдаги режаларимизни муҳокама қилдик”, дея ёзади Саидов.

Қолаверса, вазир Огородниковга Ўзбекистондаги янги дипломатик миссиясига муваффақиятлар тилаган.

Маълумот учун, Александр Огородников 1970 йилда туғилган. 1993 йилда Минск радиотехника институтини “Микроэлектроника ва яримўтказгичли қурилмалар” мутахассислиги бўйича тамомлаган, 2007 йилда Беларус давлат иқтисодиёт университетида “Иқтисодиёт ва халқ хўжалигини бошқариш” мутахассислиги бўйича магистратурани тамомлаган.

Эслатиб ўтамиз, жорий йилнинг 14 январь куни Беларусь резиденти Александр Лукашенко Ўзбекистонга янги элчи этиб Александр Огородниковни тайинлаганди. Шунингдек, Лукашенко янги элчига Ўзбекистонда ҳам Қозоғистондаги каби сиёсат олиб борилиши кераклигини таъкидлаганди.