Лола Каримова Ислом Каримовга “миллат отаси” рутбасини берди

Ислом Каримов бирор қарор қабул қилганида, баъзан бу қарорлар ниҳоятда оғир ва мураккаб бўлишига қарамай, доимо келажак авлодлар ҳақида, Ўзбекистоннинг келажаги ҳақида ўйлаган. Бу ҳақда унинг кенжа қизи Лола Каримова ўзининг ижтимоий тармоқлардаги саҳифасида ёзди. 

Бугун, 2 сентябрь куни Ўзбекистоннинг Биринчи Президенти Ислом Каримов вафотига ўн йил тўлди. Каримов вафотидан кейин унинг оиласи тақдири буткул ўзгариб кетди. 2013 йилдаёқ маҳкамага тортилган Гулнора Каримова айни вақтда ҳам қамоқда сақланмоқда. Унинг фарзандлари мамлакат ташқарисида. Оиланинг кенжаси Лола Каримова эса мамлакатни тарк этиб, АҚШдан қўним топган, у яқинда турмуш ўртоғи Темур Тилляев билан ҳам ажрашганини овоза қилди. Шунингдек, қизи Марям билан ҳам муносабатларни узган. 78 ёшни қаршилаган Татьяна Каримова эса Тошкентда истиқомат қиляпти. 

Ҳар йили Каримовлар оиласи вакиллари ижтимоий тармоқлар орқали Ислом Каримовни хотирлаши анъанага айланган. Лола Каримова бу сафар отаси билан боғлиқ воқеаларни хотирламади, аксинча, Ислом Каримовни хотирлаётган, у ҳақида илиқ фикрларни айтаётганларга миннатдорлик билдирди. 

“Бугун отам оламдан ўтганларига роппа-роса ўн йил бўлди.

Айтишларича, инсон шахсияти қанчалик буюк бўлса, унинг босиб ўтган йўли ва қолдирган меросини чинакам англаш ва муносиб баҳолаш учун шунчалик кўп вақт керак бўлади. Бу худди улкан сайёрага ўхшайди: у қанчалик катта бўлса, уни тўлалигича кўриш учун шунчалик узоқроқ масофадан қараш керак. Менимча, бу ерда ҳам худди шундай.

Йиллар ўтган сари мен буни тобора аниқроқ кўряпман, ҳис қиляпман ва англаяпман. Самарқандда қабрларига борганимда, у кишини зиёрат қилиш, дуо қилиш учун келаётган инсонларни кўрганимда. Бугун эрталаб Москвадан келган суратларда у кишининг ҳайкали пойига одамлар келганини кўрганимда. Дунёнинг турли бурчакларида – Парижда ёки қаерда бўлмайин – ватандошларимни кўрганимда. Улар доимо отам ҳақида илиқ ва яхши сўзлар айтадилар, менга эса яқин, қадрдон инсондек муносабатда бўладилар. Бу мен учун жуда қадрли.

Бугун отамни хотирлаётган, у кишини яхши сўзлар билан ёдга олаётган барча инсонларга чин қалбимдан, бутун юрагим билан миннатдорлик билдирмоқчиман”, дейди Лола Каримова.

У сўзида давом этаркан, марҳум отасина “миллат отаси” рутбасини берган. 

“Отамни Миллат отаси – янги давлат, мустақил Ўзбекистонни барпо этган ва унга асос солган, унинг суверен давлат сифатида шакллантирган ҳамда келажакда равнақ топиши учун зарур бўлган давлат институтларини яратган инсон сифатида хотирасида сақлаб келаётган барчага ўз ташаккуримни изҳор этаман.

Мен шунга гувоҳманки, у киши қарор қабул қилар эканлар, баъзан бу қарорлар ниҳоятда оғир ва мураккаб бўлишига қарамай, доимо келажак авлодлар ҳақида, Ўзбекистоннинг келажаги ҳақида ўйлар эдилар.

Хозирда ҳам мен у кишининг руҳи қаердадир яқинда, кузатиб турганини ҳис қиламан.

Яна бир бор барчангизга чин қалбимдан ташаккур айтиб, отам — Мустақил Ўзбекистоннинг Биринчи Президенти хотирасига бўлган ҳурмат ва эҳтиромингиз учун чексиз миннатдорчилигимни билдирмоқчиман”, дейди Каримова оиласининг кенжаси.