“Ливерпуль”нинг Франкфуртга сафарида техник носозлик юз берди

“Ливерпуль”нинг Чемпионлар лигаси доирасида “Айнтрахт”га қарши ўйини олдидан жиддий сафар муаммоси юз берди. Клуб самолётидаги техник носозлик туфайли жамоанинг Германияга парвози деярли тўрт соатга кечиктирилди. Бу ҳақда “The Guardian” нашри хабар берди.

Арне Слот бошчилигидаги жамоа 21 октябрь куни маҳаллий вақт билан соат 16:00 да Ливерпулнинг Жон Леннон аэропортидан учиши керак эди. Бироқ кетма-кет кечикишлар туфайли футболчилар аэропортдаги шахсий терминалда узоқ кутишга мажбур бўлди. Самолёт соат 19:51 да ҳавога кўтарилди ва Франкфурт аэропортига маҳаллий вақт билан 23:00 да етиб борган. Кечикиш сабабли “Ливерпуль”нинг ўйиндан олдинги матбуот анжумани бекор қилинди.

“Франкфуртнинг “Айнтрахт” клубига қарши ўйиндан олдинги матбуот анжумани самолётдаги техник муаммолар туфайли бекор қилинди. Кечикиш сабабли режалаштирилган ушбу тадбирни ўтказишнинг имкони бўлмади”, дейилади клуб расмий баёнотида.

UEFA қоидаларига кўра, жамоалар ўйиндан бир кун олдин ОАВ мажбуриятларини бажариши лозим. Бироқ “Ливерпуль”га жарима қўлланиши кутилмаяпти, чунки кечикиш клуб назоратидан ташқарида бўлган.
Шунингдек, “Ливерпуль”нинг  Германияга сафарида ярим ҳимоячи Райан Гравенберх бўлмаган. Футболчи “Манчестер Юнайтед”га қарши ўйинда тўпиғидан жароҳат олган эди, шу сабабли Гравенберх ушбу ўйинни ўтказиб юборади.

Маълумот учун, “Ливерпуль” жамоаси кетма-кет тўртта учрашувдан бери мағлубиятга учрамоқда. Клуб бу сафар Франкфуртга қарши ўйинда ушбу ёмон серияни тўхтатишни мақсад қилган.