Литвадаги сайловда социал-демократлар ғалаба қозонди

Литвада кеча, 27 октябрь куни бўлиб ўтган парламент сайловларининг иккинчи босқичида мухолифатдаги Литва социал-демократик партияси (ЛСДП) кўпчилик овозларни олди. Бу ҳақда мамлакатнинг Бош сайлов комиссияси хабар берди.

Социал-демократлар икки тур натижаларига кўра, парламентдаги 141 ўриндан 52 ўринга эгалик қилади. Ҳукмрон “Ватан иттифоқи – Литва христиан-демократлари” консерватив партияси – 28 ўринни, “Заря Немунас” партияси – 20 ўринни, “Литва учун” демократик иттифоқи – 14 ўринни олади. Литва деҳқонлари иттифоқи – саккиз мандатга эгалик қиладиган бўлди.

Социал-демократлар етакчиси Вилия Блинкявичюте партия қароргоҳида олқишлар билан кутиб олинган. Унинг таъкидлашича, сайлов натижалари Литва аҳолиси қаерда яшашидан қатъи назар ўзгаришларни хоҳлашини, уларга мутлақо бошқа ҳукумат кераклигини кўрсатган.

Бош вазир Ингрида Шимоните бошчилигидаги “Ватан иттифоқи – Литва христиан-демократлари” ҳукмрон консерватив партияси аввалроқ 28 мандат олган парламент сайловларининг иккинчи босқичида иккинчи ўринни эгаллади. Партия етакчиси, мамлакатнинг Ташқи ишлар вазири Габриэлюс Ландсбергис аллақачон ўз партияси мағлубиятини тан олган ва социал-демократларни ғалаба билан табриклаган.

Қайд этилишича, мамлакатда инфляция ошгани, давлат хизматлари ёмонлашгани ва бойлар ва камбағаллар ўртасидаги тафовут ошгани сабабли ўнг марказчи коалициянинг нуфузи пасайган. Социал-демократлар ўзларининг сайловолди кампанияси доирасида ички ва ижтимоий сиёсатдаги ўзгаришларга алоҳида эътибор қаратган.

Блинкявичюте Европарламент аъзоси лавозимини тарк этиши ва Литва ҳукуматини бошқариши кутилмоқда, бироқ унинг ўзи ҳозиргача журналистларнинг бу борадаги саволларига аниқ жавоб бермаган.

Эслатиб ўтамиз, аввалроқ Литва Ташқи ишлар вазири Габриэлюс Ландсбергис Россия Шимолий Корея аскарларини урушда иштирок этиш учун жалб қилганидан сўнг, Украинанинг Ғарб иттифоқчиларини ҳам қўшин юбориш ғоясига қайтишлари кераклигини айтганди. Сабаби Россия билан бевосита чегарадош бўлган 2,8 миллион аҳолига эга собиқ Совет республикаси, агар Москва Украинага қарши урушда ғалаба қозонса, Россия агрессиясининг навбатдаги нишонига айланиб қолишидан қўрқади. Шу боис, Литванинг барча йирик томонлари Украинага кўпроқ ёрдам бериш ва мудофаа харажатларини сақлаб қолиш ёки ҳатто ошириш тарафдори.