Лео XIV Ватикан тахтига ўтирди (фоторепортаж)

Бугун, 18 май куни Ватиканда 267-чи Рим епископи Лео XIV хизматининг расмий бошланиши (тахтга ўтириши) муносабати билан тантанали маросим бўлиб ўтди. Жараён Ватикан янгиликлар порталида жонли эфирда трансляция қилинди.

Рим-католик черковининг бошлиғи папа ҳокимиятининг тимсолларини – “балиқчи узуги” ва паллиумни (қўй жунидан қилинган, устига хочлар тикилган лента) қабул қилди. Шу пайтдан бошлаб унинг понтификати расман бошланди.

Янги папа Авлиё Пётр майдонидаги маросимда черковни тинчлик ва бирдамликка чақирди ва “Ер ресурсларидан фойдаланадиган ва энг камбағалларни четга сурадиган” иқтисодий ҳақиқатни қоралади.

Лео XIV маросимда дунёдаги 1,4 миллиард Рим католикларининг етакчиси сифатида бугунги муаммолардан қайтмаслигини ва ҳеч бўлмаганда қашшоқликка қарши кураш ва атроф-муҳитни муҳофаза қилиш каби ижтимоий масалаларда олдинги Рим папаси Франциск меросини давом эттиришини айтди.

Понтификнинг сўзларига кўра, кардиналлар “христиан динининг бой меросини сақлаб қолишга қодир ва айни пайтда бугунги дунёнинг муаммолари ва қийинчиликларига қарши туриш учун келажакка интилувчи” одамни танлаган.

“Ўз мурожаати давомида Лео XIV етти марта “бирлик” ва “бирлашган” сўзларини ва тўрт марта “уйғунлик” сўзини ишлатди”, деб ёзди “Reuters”агентлиги.

Рим папасининг тахтга ўтириш маросимига хорижий давлатлар, қироллик хонадонлари ва диний конфессиялардан 150 дан ортиқ делегациялар келган. Улар орасида Украина Президенти Владимир Зеленский, АҚШ вице-президенти Жеймс Дэвид Вэнс ва Давлат котиби Марко Рубио, Италия Бош вазири Жоржия Мелони, Европа комиссияси раиси Урсула фон дер Ляйен, Испания ва Бельгия қироллари Филипп VI ва Филипп ҳамда бошқа кўплаб жаҳон етакчилари бор эди.

Маросим бошида Вэнс Зеленский билан қўл бериб кўришди. Охирги марта улар февраль ойида Оқ уйдаги жанжал пайтида бир-бирларини кўришган.
Айни пайтда Рим папаси Лео XIV Владимир Зеленский билан биринчи шахсий аудиториясини ўтказади.

“Украина адолатли ва мустаҳкам тинчлик бўйича музокаралар ниҳоят амалга ошишини кутмоқда”, деди понтифик учрашув олдидан.

Лео XIV 8 май куни якунланган конклавдан сўнг Рим-католик черковининг бошлиғи бўлди. У Америка Қўшма Штатларидан чиққан биринчи папа бўлди.