Куртулмуш Исроилнинг БМТга аъзолигини тўхтатишга чақирди

Туркия парламенти спикери Нўмон Куртулмуш Исроилнинг халқаро ташкилотлардаги, жумладан, Бирлашган Миллатлар Ташкилотидаги аъзолигини тўхтатиш бўйича шошилинч ва аниқ чоралар кўришга чақирди. Бу ҳақда у кеча, 29 август куни мамлакат парламентининг Ғазо секторидаги вазиятга бағишланган навбатдан ташқари йиғилишида сўз очди.

“Бугун мен халқаро ҳамжамиятга мурожаат қилиб, Исроил геноцид сиёсатидан воз кечмагунча, унинг барча халқаро ташкилотлардаги, жумладан, БМТда аъзолигини тўхтатиш зарурлиги ҳақида таклиф билдираман ва баён қиламан”, дейди у.

Куртулмушнинг эслатишича, Туркия Буюк Миллат Мажлисининг 28-сессиясида Ғазо секторида ва бутун Фаластин ҳудудларида Исроил томонидан содир этилган геноцид ва жиноятларга, шунингдек, унинг тажовузи ва экспансионистик ҳаракатларига оид олтита қўшма декларация ҳамда Президент фармони қабул қилинган.

Парламент спикерининг айтишича, Исроилнинг йиллар давомида олиб борган босқин, вайронкорлик ва аннексия сиёсати сўнгги икки йил ичида геноцид даражасидан ҳам ошиб кетган.

“На зулм, на шафқатсизлик, на ваҳшийлик, на оммавий қирғин, на геноцид – уларнинг ҳеч бири сионистик Исроилнинг қилаётганларини ифодалай олмайди”, дейди Куртулмуш.

Сиёсатчининг сўзларига кўра, ҳозирга қадар оммавий қирғин қурбонлари деярли 70 минг кишига етган, уларнинг катта қисми аёллар ва болалар. Фуқаролик инфратузилмаси атайлаб ҳужум остига олинган, мактаблар, ибодатхоналар ва шифохоналар эса бомбардимонларга дуч келган.

Куртулмуш яқинда Фаластин жанубидаги “Носир” шифохонасига уюштирилган ҳужум оқибатида беморлар, тиббиёт ходимлари ва халқаро ОАВ вакиллари ўлдирилганини ҳам эслатиб ўтган. Унинг сўзларига кўра, Ғазодаги 36 та шифохонанинг 33 таси бутунлай вайрон қилинган, ёки оғир шикастланган.

“Бошқача айтганда, Ғазодаги тиббий хизматлар амалда қайтмас нуқтага етди. Ғазо зудлик билан қайта тикланиши керак”, дейди Куртулмуш.

Унинг билдиришича, одамларни атайлаб оч қолдириш бир неча ойлардан буён бегуноҳ инсонларни ўлдириш воситаси сифатида қўлланилмоқда.

“Ҳаттоки озиқ-овқат карвонлари ҳам сионистик ваҳшийларнинг ўлим тузоғига айланган. Исроил Ғазони босиб олиш қарорини қабул қилган ҳолда инсониятга қарши жиноятларни давом эттирмоқда. БМТ ва бошқа халқаро ташкилотлар Исроил Ғазо аҳолисини атайлаб очлик ва тўйиб овқат емай яшашга маҳкум қилганини тасдиқлашди. Исроил дарҳол ўт очишни тўхтатишга ва барча қуролли кучларини ҳудуддан олиб чиқишга рози бўлиши керак. Ғазо халқаро гуманитар ёрдам ва қайта қуриш режаларига мувофиқ имкон қадар тезроқ тикланиши лозим. Ҳудудни бошқариш фаластинликларга тегишли бўлиши, унинг хавфсизлигини эса БМТ тинчликпарвар кучлари кафолатлаб бериши шарт. Бундан ташқари, яқинда Ирландия Президенти айтганидек, Ғазо секторида гуманитар шароитни таъминлаш учун БМТ кучларини жойлаштириш шошилинч заруратдир”, дейди у.

Турк сиёсатчисининг таъкидлашича, Исроил ваҳшийлиги фақат Ғазо билан чекланиб қолмаяпти, балки Қуддус ва Иордан дарёсининг ғарбий соҳилида ҳам зўравонликни кучайтириб, ерларни босиб олиш ва биноларни ноқонуний бузиш ишларини жадаллаштирмоқда.

Куртулмушнинг қайд этишича, “Эл ҳудуди” деб аталган зонада янги ноқонуний мустамлака қуриш қарори Шарқий Қуддусни Ғарбий соҳилидан ажратишга қаратилган бўлиб, халқаро ҳамжамиятда кенг норозилик уйғотган.

“Бундан ташқари, Исроил парламенти (Кнессет) халқаро ҳуқуқни бузган ҳолда БМТнинг Фаластин қочқинларига ёрдам берувчи агентлиги фаолиятини тақиқловчи қонунлар қабул қилмоқда, Ғазо ва Ғарбий соҳилда гуманитар ёрдам етказилишига тўсқинлик қилмоқда, Фаластин ерларини эгаллаб оляпти ва уларни аннексия қилишга қаратилган қарорлар чиқармоқда”, дейди у.

Куртулмуш, шунингдек, бутун дунёда Биньямин Нетаньяху бошчилигидаги Исроил ҳукуматининг шафқатсиз ҳаракатларига қарши норозилик кучаяётганига эътибор қаратган.

“Тили, дини, ирқи ёки географик жойлашувидан қатъи назар инсоният бу қотиллар тўдасига қарши ўз овозини кўтармоқда. Сионистик Исроил деярли барча мамлакатлар ва пойтахтларда қораланяпти. Шу сабабли, ҳатто яқиндагина сукут сақлаган ёки Исроилни қўллаб-қувватлашга уриниб келган Ғарб ҳукуматлари ва парламентлари ҳам бунга муносабат билдирадиган бўлди. Бир қатор Ғарб ҳукуматлари келаси ой Фаластинни тан олишга тайёргарлик кўрмоқда. Тўлиқ бўлмаса ҳам кўплаб Ғарб мамлакатлари Исроилга қарши санкциялар жорий қилишга тайёрланяпти. Бундан ташқари, Осиё, Африка ва Лотин Америкаси давлатлари Туркия билан бир қаторда бу масалада етакчи роль ўйнамоқда. Дунё мамлакатлари парламентларида Исроилга қарши самаралироқ санкциялар жорий этиш талаби тобора кучайиб бормоқда”, дейди у.

Турк спикерининг айтишича, ҳатто АҚШ Конгрессида ҳам Ғазода ўт очишни тўхтатиш ва гуманитар ёрдамни тўсиб қўйиш сиёсатини бекор қилишни талаб қилаётган аъзолар сони ортиб бормоқда.

“Биз геноцид ва аннексия сиёсатига қарши туриш, шунингдек, инсоният фронтини қўллаб-қувватлаш учун кўп қиррали ва кенг кўламли саъй-ҳаракатларимизни, жумладан, парламент майдонида давом эттиришимиз керак. Геноцид содир этган Нетаньяху ва унинг тўдасини халқаро майдонда янада яккалаш учун барча имкониятларни ишга солишимиз лозим”, дейди у.

Шунингдек, Куртулмуш Туркия Фаластин халқининг курашини эркин ва суверен Фаластин давлати тузилгунига қадар қўллаб-қувватлашини билдирган.

Эслатиб ўтамиз, аввалроқ Туркия Ташқи ишлар вазири Хоқон Фидан мамлакат Исроил билан барча иқтисодий ва савдо муносабатларини тўхтатгани ҳамда ўз ҳаво ҳудудини Исроил самолётлари учун ёпганини маълум қилганди.  Фиданнинг сўзларига кўра, Исроил икки йилдан бери Ғазода “геноцид” содир этиш билан бир пайтда халқаро ҳуқуқни қасддан бузиб келмоқда. Туркия ўзига ҳамфикр бўлган давлатларни Исроилга қурол-яроғ етказиб беришни тўлиқ тўхтатиш ва савдони бутунлай узишга чақирмоқда.