Куртуа терма жамоадан бир йиллик танаффус олмоқчи

Бельгия миллий терма жамоаси дарвозабони Тибо Куртуа 2026 йилги Жаҳон чемпионати якунланганидан сўнг терма жамоадаги фаолиятидан бир муддат танаффус қилиш ниятида эканини маълум қилди. Бу ҳақда журналист Альберто Перейро хабар берди.

Кеча, 11 июль куни Жаҳон чемпионати чорак финалида Испанияга қарши кечган учрашувда (1:2) 34 ёшли дарвозабон жароҳат олди ва 71-дақиқада кўз ёшлари билан майдонни тарк этди. Унинг ўрнига майдонга тушган Сенне Ламменс эса Бельгиянинг мағлубиятига олиб келган ҳал қилувчи хатога йўл қўйди.

“Мен бир йиллик танаффус олиб, кейин Жаҳон чемпионатининг саралаш босқичи ҳамда Европа чемпионатида яна терма жамоа сафида ўйнашни хоҳлайман. Бельгия футбол федерацияси раҳбарияти бу режамни қўллаб-қувватлайдими ёки йўқми, билмайман”, деди Куртуа.

Дарвозабон бундан аввал ҳам 2026 йилги Жаҳон чемпионатидан кейин миллий жамоадаги фаолиятини якунлаши мумкинлигини айтган ва буни жисмоний ҳолати билан изоҳлаган эди.

“Менимча, яна тўрт йил давомида шу суръатда ўйнашни давом эттира олмайман”, деганди у.

Маълумот учун, Куртуа 2018 йилдан буён Мадриднинг “Реал” клуби шарафини ҳимоя қилиб келмоқда. У “қаймоқранглилар” сафида уч марта Испания чемпиони, икки карра Чемпионлар лигаси, UEFA Суперкубоги ва Испания Суперкубоги ғолиби бўлган. Шунингдек, у бир марта Испания Қирол кубоги, FIFA Клублар ўртасидаги Жаҳон чемпионати ҳамда Қитъалараро кубокни қўлга киритган.

Фаолияти давомида Куртуа Бельгиянинг “Генк”, Англиянинг “Челси” ва Испаниянинг “Атлетико Мадрид” клублари сафида ҳам тўп сурган.

У 2018 йил Россияда бўлиб ўтган Жаҳон чемпионатида Бельгия миллий терма жамоаси билан бронза медалини қўлга киритган. Тибо Куртуа Бельгия миллий терма жамоаси сафида жами 115 та учрашувда майдонга тушган.