Куман Нидерландия мураббийлигидан кетди

Нидерландия миллий терма жамоаси бош мураббийи Рональд Куман 2026 йилги Жаҳон чемпионати якунланганидан сўнг, ўз лавозимини тарк этишини маълум қилди. Бу ҳақда мамлакат футбол ассоциацияси матбуот хизмати хабар берди.

Мутахассис ижтимоий тармоқда эълон қилган мурожаатида терма жамоадаги иккинчи фаолиятига якун ясашга қарор қилганини билдирди.

“Кеча кечқурун Нидерландия терма жамоаси бош мураббийи сифатидаги фаолиятимни якунлашга қарор қилдим. Албатта, мен бу саҳифани Жаҳон чемпионлиги билан ёпишни истардим. Афсуски, бу орзуим ушалмади. Аммо энг муҳими – мен фахрланаман. Футбол менга берган барча нарсалардан, йўлимда учратган инсонлардан ва энг катта иштиёқимни касбга айлантира олганимдан мамнунман”, деб ёзди Куман.

Нидерландиялик мураббий шунингдек футболчиларга, мураббийлар штабига, Нидерландия Қироллик футбол ассоциациясига, миллий жамоа ходимларига, фаолияти давомида ишлаган клубларига ҳамда мухлисларга қўллаб-қувватлаганлари учун миннатдорлик билдирди.

Куман мурожаатида рафиқаси Бартина оғир касалликни бошидан кечирганини ҳам эслаб ўтди. Унинг таъкидлашича, айнан шу давр – ҳаётда соғлиқ ҳар қандай футбол натижасидан устун эканини яна бир бор англатган.

Эслатиб ўтамиз, Нидерландия терма жамоаси 2026 йилги Жаҳон чемпионатининг 1/16 финал босқичида Марокашга қарши баҳсда асосий ва қўшимча вақтни 1:1 ҳисобида якунлаган, пенальтилар сериясида эса 2:3 ҳисобида мағлуб бўлиб, мусобақани тарк этган эди.

Рональд Куман эса, Нидерландия терма жамоасини иккинчи марта 2023 йилдан буён бошқариб келаётган эди.