Криминал авторитет “Коля Қирғиз”га алоқадор яна 2 киши қўлга олинди (видео)

Қирғизистонлик криминал авторитет Қамчибек Кўлбоев (Қамчибек Асанбек)нинг уюшган жиноий гуруҳи аъзолари Миллий хавфсизлик давлат қўмитаси томонидан қўлга олинди. Бу ҳақда АКИpress хабар берди.

Қайд этилишича, Қамчибек Кўлбоевнинг уюшган жиноий гуруҳи аъзоси, илгари Қоракўл шаҳри ва Иссиқкўл вилоятининг “назоратчиси” бўлган Қирғизистон фуқароси, “Жеша” лақабли Т.Ж.Ж. товламачиликда ва ўзгаларнинг мол-мулкини ўғирлашда гумон қилиниб, қўлга олинди.

Бундан ташқари, уюшган жиноий гуруҳнинг ноқонуний фаолиятида иштирок этганликда гумон қилиниб, Асанбекнинг шахсий қўриқлаш бўлими аъзоси сифатида хизмат қилган Қирғизистон фуқароси М.Н.К. ҳам ушланган. Қўлга олинганлар Қоракўл шаҳар ИИБнинг вақтинчалик сақлаш ҳибсхонасига жойлаштирилган.

Маълумот учун, Қамчибек Асанбек Қирғизистон ва МДҲдаги энг нуфузли “ворзакон”лардан бири бўлган. Тахаллуси – “Коля Қирғиз”. У наркотик бизнеси, қурол-яроғ савдоси, товламачилик, қора кўчмас мулк, талончилик, автомашина ўғирлаш, бандитизм, пул ювиш, давлат мулкини ўғирлаш ва буюртма асосида қотиллик қилиш билан шуғулланган. У Қирғизистондаги миллионерлардан бири эди.

2020 йилдан бери Қирғизистон Миллий хавфсизлик давлат қўмитаси криминал авторитетни бир неча бор ҳибсга олган. 2023 йилнинг августида Қамчибек Кўлбоевга нисбатан жиноят иши даъво муддати ўтгани сабабли тугатилган. Криминал авторитет Қамчибек Асанбек Қозоғистонда трансмиллий жиноий ташкилот тузишда гумон қилинган. У 2023 йилнинг октябрь ойида Бишкекда ўлдирилди.

Эслатиб ўтамиз, аввалроқ криминал авторитет Қамчибек Кўлбоев (Қамчибек Асанбек) нинг уюшган жиноий гуруҳига ҳомийлик қилган ва кўплаб қизларни зўрлаган шахс қўлга олинганди.