Кремль Европага жиддий айблов қўйди

Россия Президенти Владимир Путиннинг матбуот котиби Дмитрий Песков Европа Иттифоқи мамлакатлари Украинадаги можарони тинч йўл билан ҳал қилишга жиддий тўсқинлик қилаётганини билдирди. Бу ҳақда Кремль вакили бугун, 5 сентябрь куни “Аргументы и Факты” нашрига берган интервьюсида сўз очди.

Унга кўра, Европа давлатларининг позицияси салбий ва улар ҳар қандай мулоқотни деярли имконсиз ҳолатга келтириб, музокараларни йўққа чиқармоқда. 

Песковнинг айтишича, АҚШ Президенти Дональд Трампнинг қарашлари Европа давлатларидан фарқли равишда “анча конструктив ва у уруш қилишдан кўра савдо қилишни афзал кўради”. У, шунингдек, Трампнинг ёндашуви Россия позициясининг айрим жиҳатлари билан мос тушишини қайд этган. 

“Биз ҳам мақсадларимизга имкон қадар, тинч йўл билан эришишни истаймиз”, деган Песков. 

Россиядан бундай оҳангдаги баёнотлар янграётган бир пайтда, Европа Украинани қўллаб-қувватлаш мақсадида йиғилишлар ўтказмоқда. Масалан, кеча, 4 сентябрь куни Парижда “кўнгиллилар коалицияси” йиғилиши бўлиб ўтди, унда 39 давлат вакиллари иштирок этди. Франция Президенти Эммануэль Макроннинг маълумотига кўра, йиғилишда 26 мамлакат Украинага хавфсизлик кафолатларини таъминлаш учун ўзининг қуруқликдаги, денгиздаги ёки ҳаво кучларини юборишга тайёрлигини билдирган. Буюк Британия ҳукумати эса коалиция аъзолари Киевга узоқ масофали ракеталар етказиб беришга розилик билдирганини қўшимча қилган.

Эслатиб ўтамиз, кеча, 4 сентябрь куни Дональд Трамп Европа етакчилари билан видеоселектор йиғилиши чоғида уларни Россия нефтини сотиб олиш орқали Украинадаги “урушни молиялаштираётганликда” айблаган ва Москвани ушбу даромад манбаидан узиб қўйишга, шунингдек, бу борада Хитойга босим ўтказишга чақирганди. Трампнинг айбловларига жавобан Еврокомиссия раҳбари Урсула фон дер Ляйен уруш бошланганидан сўнг, Европа Иттифоқи мамлакатлари томонидан Россия нефтини харид қилиш ҳажми кескин камайганига ишора қилган.

Бир томонда эса ҳалигача Путин ва Зеленскийнинг учрашуви ҳақида аниқ гап-сўзлар йўқ, музокаралар сўроқ остида. Мамлакат етакчилари бир-бирига тўғри келмайдиган шартларни ўртага ташламоқда. Россия раҳбари Владимир Путин 3 сентябрь куни тўрт кунлик Хитой сафари якунида, Украина раҳбари Владимир Зеленский билан Москвада учрашишга тайёрлигини билдирганди. Унинг сўзларига кўра, Зеленский рози бўлса, музокаралар Москвада ўтказилиши мумкин. Шу билан бирга, у бундай ташаббус АҚШ Президенти Дональд Трамп томонидан илгари сурилганини ҳам қайд этган. Аммо кутилганидек бу таклиф Украина томонидан кескин рад этилди. Украина Ташқи ишлар вазири Андрей Сибига Х тармоғидаги саҳифасида Путиннинг музокара ўтказиш учун Москвага чорловини қабул қилиб бўлмайдиган таклиф, дея атаган. Зеленскийнинг ўзи ҳам Путиннинг таклифини “амалга ошириб бўлмайдиган” иш дея баҳолаган ва рад этган.