Кремль Путин, Трамп ва Зеленский учрашувини рад этди

Россия, АҚШ ва Украина Президентлари Владимир Путин, Дональд Трамп ва Владимир Зеленскийнинг уч томонлама учрашуви яқин келажакда бўлиши даргумон. Бу ҳақда бугун, 3 июнь куни Кремль матбуот котиби Дмитрий Песков маълум қилди.

“Очиғини айтсам, бу яқин келажакда даргумон. Чунки Президент Путин бир неча бор юқори даражадаги алоқаларга тайёрлигини таъкидлаб, бу алоқалар техник даражада, экспертлар даражасида ишлаб чиқиладиган келишувлар натижаси бўлиши кераклигини қайд этган. Шунинг учун Президент Путин бу алоқаларни қўллаб-қувватлайди, бироқ уларга яхши тайёргарлик кўриш керак, деб ҳисоблайди”, деди Песков.

Кеча, 2 июнь куни Оқ уй матбуот котиби Кэролайн Ливитт АҚШ Президенти Дональд Трамп Путин ва Зеленский билан Туркиядаги тўғридан тўғри музокараларнинг учинчи раундида учрашишга тайёр эканини айтганди.

“Президент Трамп агар гап шу ҳақида кетса, бунга очиқ, бироқ биринчи навбатда у бу икки етакчи ва ҳар икки томоннинг музокаралар столига ўтиришини истайди”, дея таъкидлади Ливитт.

Ўша куни Туркия Президенти Ражаб Тойиб Эрдўған ҳам Путин, Зеленский ва Трампнинг июнь ойи охирида Истанбул ёки Анқарада учрашишини таклиф қилган эди. Туркия Вазирлар Маҳкамаси йиғилишидан сўнг сўзлаган Эрдўғон унинг “энг катта орзуси” шундай учрашув бўлишини таъкидлади.

“Мен ҳатто Трампни таклиф қилмоқчиман”, деган Туркия раҳбари.

Эрдўған, агар етакчилар Туркияда йиғилса, “Улар билан ҳам шу форматда учрашишини”, “Истанбулни дунёнинг марказига айлантира олишини” қўшимча қилган.

Маълумот учун, кеча, 2 июнь куни Истанбулда Чираған саройида бўлиб ўтган тинчлик музокараларининг иккинчи босқичи бўлиб ўтди. Россия делегациясига Президент ёрдамчиси Владимир Мединский,  Украина томонига Мудофаа вазири Рустам Умаров бошчилик қилди. Учрашув ёпиқ форматда ўтказилди.