Кореяда КТЖ ва ҲАМАСни молиялаштирган ўзбекистонлик эркак ушланди

Жорий йилнинг 27 октябрь куни Жанубий Корея полицияси террорчилик фаолиятини молиялаштиришда гумонланган 29 ёшли ўзбекистонлик эркакни ҳибсга олди. Бу ҳақда “Тhe Chosun Daily” нашри хабар берди.

Қайд этилишича, ўзбекистонлик эркак “Терроризмга қарши қонун” ва “Террорчилик маблағларини тақиқлаш тўғрисида”ги қонунни бузганликда гумонланиб, ҳибсга олинган. Ҳибсга олиш жараёни Миллий разведка хизмати ва АҚШ Федерал қидирув бюроси (FBI) билан ҳамкорликда амалга оширилган. Эркак хайрия ташкилоти ниқоби остида сохта фаолият юритиб, 952 миллион вон (663 минг доллардан ортиқ) ундирган. 

Эркак экстремистик ташкилотни тарғиб қилиш учун саккизта ижтимоий тармоқда (шу жумладан, Instagram’да) аккаунт юритган. Шунингдек, Африкада қудуқ қазиш лойиҳаларига эътибор қаратувчи хайрия ташкилотини қўллаб-қувватлаш баҳонасида тахминан 620 минг бирлик USDT виртуал активини йиғган. Ҳибсга олиш пайтида бу маблағнинг умумий қиймати тахминан 952 миллион корейс вонини ташкил этган.

Полиция маълумотларига кўра, у тўпланган маблағларнинг бир қисмини БМТ томонидан террорчи деб тан олинган КТЖ (Катиба ат-тавҳид вал-жиҳод) ва ҲАМАСга ўтказган. Расмий ҳисоб-китобларга кўра, бу миқдор 27 миллион вон атрофида.

“ҲАМАСга ўтказилган маблағлар миқдорининг аниқланиши камдан-кам учрайдиган ҳолат. Кўпроқ маблағ берилган бўлиши мумкин”, деб таъкидлади полиция вакили.

Аниқланишича, эркак Instagram’да “Аллоҳ йўлида жиҳод, муқаддас урушни биргаликда олиб борайлик” каби кўплаб экстремистик чақириқларни жойлаштирган. Бундан ташқари, у хайрия маблағларини жалб қилиш учун ички ва халқаро банк ҳисоблари ҳамда кредит карта тўловлари ҳаволаларини улашган.

Шунингдек, ўз миллати вакилларидан бевосита маблағ йиғиш мақсадида Геонгги минтақасида футбол клубини ташкил этган. Футбол клуби орқали йиғилган маблағлар ҳозирча аниқланмаган.

Эркак Жанубий Кореяга 2018 йилда талаба визаси билан борган, кейинчалик ўқишни ташлаб кетган ва 2023 йилнинг мартидан бери қочқин мақомини сўраб мурожаат қилган. У ҳибсга олингунга қадар қочқин мақомини олиш учун 11 марта мурожаат қилган, аммо рад этилган.

“Қочқин мақомини сўраб берилган аризаларни кўриб чиқиш одатда уч ой давом этади. Тахминларга кўра, ўзбекистонлик эркак Корея ҳудудига ариза бериш даврида виза муддатини узайтириш имкониятидан фойдаланиб кирган”, дейди полиция вакили.

Эркак илгари Ўзбекистонда ҳам террорчилик маблағларини молиялаштиришда айбланиб, маҳаллий қидирувда бўлган. Ўзбекистон элчихонаси унинг паспортини бекор қилиб, Корея полициясидан уни ҳибсга олишни сўраган.

Полиция нинг жойлашган манзилини кузатув камераси ва молиявий транзакциялар орқали аниқлаб, 16 октябрь куни Ансеонгдаги ётоқхонада ҳибсга олган. Ҳибс вақтида саккизта мобил телефон ва бир ноутбук мусодара қилинган, улардан олтитаси устида суд-тиббий экспертизаси олиб борилмоқда.

Полиция ўзбекистонлик эркак Кореяда яшаган даврида қўшимча криптоактивлар ёки нақд маблағ тўплаганми ва унинг ҳамкорлари бўлган ёки йўқлигини ўрганмоқда.

Эслатиб ўтамиз, аввалроқ Қирғизистон Миллий хавфсизлик давлат қўмитаси Бишкекдаги савдо марказларида терактлар уюштириш билан таҳдид қилган шахсни қўлга олганди.