Конгонинг собиқ президенти ўлимга ҳукм қилинди

Конгонинг собиқ президенти Жозеф Кабила давлатга хиёнат қилишда айбдор деб топилиб, ўлим жазосига ҳукм қилинди. Бу ҳақда “Le Figaro” хабар берди.

54 ёшли Кабила Руанда томонидан қўллаб-қувватланаётган ҳукуматга қарши қуролли гуруҳ – “23 март ҳаракати” (М23) билан ҳамкорлик қилганликда айбланган.

У суд жараёнида қатнашмаган ва адвокатлари ҳам бўлмаган. Ҳукм унинг мамлакатга қайтганидан кейин эълон қилинган, бу эса Киншасада ҳукумат ташвишига сабаб бўлган. 

Май ойида ҳукумат ташаббуси билан Кабиланинг умрбод сенаторлик ваколати бекор қилинган, июлда эса суд жараёни бошланган. Унинг ҳозирги манзили ошкор этилмаган. Мутахассисларнинг фикрича, ҳукмга қарамай, Кабиланинг ҳибсга олиниши эҳтимоли паст. 

2024 йилда ўлим жазоси бўйича мораторий бекор қилинган бўлса-да, ҳозиргача мамлакатда қатл этиш амалда қўлланмаган. Қарор устидан фақат процессуал асосларда, иш моҳиятини қайта кўриб чиқмасдан, судга шикоят қилиш мумкин. 

Маълумотларга кўра, Кабила май ойида М23 назоратидаги Шимолий Киву вилоятининг маъмурий маркази Гома шаҳрида бўлган. М23 2012 йилда генерал Лоран Нкунда бошчилигидаги “Халқни ҳимоя қилиш миллий конгресси” базасида тузилган бўлиб, ўз вазифасини тутси этник озчилигини ҳимоя қилиш деб билади. 2022 йилда у яна ҳарбий ҳаракатларга киришди ва 2025 йил январида Гомани эгаллаб олди. Шу воқеалардан сўнг, Конго ҳукумати Руанда билан дипломатик муносабатларни узган.

Эслатиб ўтамиз, аввалроқ Хитойнинг собиқ қишлоқ хўжалиги вазири Тан Жэньцзянь пора олгани учун икки йиллик муҳлат билан ўлим жазосига ҳукм қилинганди. Бундай қарор мамлакат шимоли-шарқидаги Цзилинь провинциясининг Чанчунь шаҳри оралиқ халқ суди томонидан қабул қилинган. Тан ҳам умрбод сиёсий ҳуқуқларидан маҳрум қилинган. Унинг барча шахсий мулки, шунингдек, ноқонуний даромадлари давлат томонидан мусодара қилинган.