Клопп ЖЧдан кейин Германия терма жамоасини бошқариши мумкин – ОАВ

Германиялик таниқли мураббий Юрген Клопп 2026 йилги Жаҳон чемпионатидан кейин Германия терма жамоасини бошқариши мумкин. Бу ҳақда “Bild” нашри хабар берди.

Ҳозирда Германия терма жамоасига Юлиан Нагельсман мураббийлик қилмоқда. Бироқ, агар жамоа Жаҳон чемпионатида кутилган натижани қайд эта олмаса, унинг бош мураббий сифатидаги келажаги хавф остида қолиши мумкин.

Маълумот учун, Германия терма жамоаси 2014 йилги Жаҳон чемпионатида ғолиб чиққан. Аммо кейинги икки турнир 2018 ва 2022 йилги Жаҳон чемпионатларида жамоа гуруҳ босқичидан ўта олмади. Шу сабабли, бўлажак мусобақада жамоадан катта натижа кутиляпти ва Нагельсманнга қўйилаётган талаблар ҳам юқори.

Маълумотларга кўра, Red Bull компанияси Клоппнинг глобал футбол раҳбари сифатидаги фаолиятидан тўлиқ қониқмаяпти. Германиялик мутахассис ушбу лавозимни 2025 йилдан буён эгаллаб келмоқда. Шунга қарамай, компания унинг ёзда яна мураббийлик фаолиятига қайтиши учун тўсқинлик қилмаслигини айтмоқда.

Эслатиб ўтамиз, аввалроқ Клопп Испаниянинг “Реал Мадрид” клуби бош мураббийлигини эгаллаши мумкинлиги ҳақида ҳам хабар берилганди.