Клопп “Реал”ни бошқариш ҳақида жиддий ўйламоқда – манба 

“Ливерпуль”жамоасининг собиқ устози Юрген Клопп “Реал Мадрид”ни бошқариш ҳақида жиддий ўйламоқда. Агар унга таклиф бўлса, мутахассис мураббийлик фаолиятига қайтиш масаласини кўриб чиқиши мумкин. Бу ҳақда инсайдер Флориан Плеттенберг хабар берди.  

“Реал Мадрид” Альваро Арбелоани бош мураббийлик лавозимига тайинлаганидан атиги бир неча кун ўтибоқ ёзги режалар устида ишлашни бошлаган.

Манбаларга кўра, агар “Реал Мадрид” раҳбарияти Клоппга жиддий таклиф билан чиқса, германиялик мутахассис мураббийлик фаолиятига қайтиш масаласини жиддий кўриб чиқади. Клопп ҳозирги ишидан мамнун бўлса-да, “Реал Мадрид” уни ҳар доим ўзига жалб қилиб келган. Агар барча шартлар Клопп кутганидек бўлса, у мураббийлик фаолиятини давом эттиришда иккита асосий вариантни кўрмоқда: “Реал Мадрид” ёки келажакда Германия терма жамоасини бошқариш.

Маълумот учун, 19 турдан сўнг Мадрид клуби Ла Лига турнир жадвалида “Барселона”дан 4 очко кам тўплаган ҳолда иккинчи ўринда бормоқда.

Эслатиб ўтамиз, “Реал Мадрид” Альваро Арбелоа қўл остидаги илк учрашувида Сегунданинг 17-ўринида бораётган жамоага мағлуб бўлиб, Испания Қироллик кубогини 1/16 босқичида тарк этганди.